Փաստ ինֆո

Պայմանագրային զինծառայող Վարուժան Ասատրյանը հոկտեմբերի 10-ին պատերազմում զոհվել է։ Համենայն դեպս հարազատներին այդպես են ասել, սակայն մինչ օրս հարազատները նրա դին չեն գտել։

Վարուժանի եղբայր Սարգիս Ասատրյանը «Փաստինֆո»-ի հետ զրույցում պատմեց, որ հոկտեմբերի 14-ին ԴՆԹ են հանձնել, բայց մինչ օրս պատասխան չկա. «Դին ուղարկել են Գորիս կամ Կապան․հինգ անգամ գնացել եմ Գորիս և Կապան։ Այնտեղից միշտ ասել են, որ Հերացիի դիահերձարանում է։ Եկել եմ Հերացի, ասել են՝ Կապանում է և այդպես օրերով Երևան-Գորիս եմ գնում։ Հետո ասացին, որ ԴՆԹ պետք է հանձնել։ Հոկտեմբերի 14-ին հանձնեցինք և արդեն 40 օրից ավել է, որ ԴՆԹ-ի պատասխանը չի գալիս»,-նշեց Սարգիս Ասատրյանը, ում կարծիքով խնդիրը ԴՆԹ-ի ապարատն է, եթե ևս մեկ ապարատով համալրվի կենտրոնը, գուցե պատասխաններն ավելի կարճ ժամանակում պատրաստ լինեն։

«Ամեն օր առավոտից մինչև երեկո ես նստած եմ Հերացիում և տեսնում եմ՝ այնտեղ ինչ է կատարվում։ Կարող է օրվա մեջ 4 անալիզի պատասխան լինի, կարող է և չլինի։ Ծնողները շատ-շատ են։ Մարդ փող էլ չունի ընկնի ման գա եղբորը կամ տղային։ Տանջվում են բոլորը։ Սա ավելի մեծ ցավ է, քան որ գտնենք ու հուղարկավորենք։ Մեզ համար կարևորը մեր եղբայրներին հուղարկավորելն է»,-ասաց Սարգիս Ասատրյանը։

Վերջինս հավելեց, որ այսօր «Դատաբժշկական գիտագործնական կենտրոն»-ում հանդիպել է ՀՀ առողջապահության նախարար Արսեն Թորոսյանին, զրուցել նրա հետ։ Նախարարը վստահեցրել է՝ հարցը շտապ պետք է լուծվի և հանձնարարականներ տվել աշխատակիցներին։

«Գնում եմ տուն և ընտանիքս ինձ է նայում՝ սպասելով, որ ինչ-որ լուր եմ ասելու։ Դիահերձարաններում, ֆուռերում, բոլոր տեղերը եղել եմ։ Արդեն որդնում են դիերը, չեն կարողանալու պահել, մոտիկ չեն կարող գնալ։ Թող դիմեն Ֆրանսիային, Ամերիկային կամ Ռուսաստանին ու մի հատ էլ ԴՆԹ-ի ապարատ ավելացնեն»,-նշեց Սարգիս Ասատրյանը։

Մանրամասները՝ տեսանյութում

Աղբյուր` Փաստինֆո