Փաստ ինֆո

Երևանի Մշակույթի և Ջազ քոլեջների միավորմամբ ստեղծված Երևանի Շառլ Ազնավուրի անվան մշակույթի պետական քոլեջի շուրջ կրքերը չեն հանդարտվում։ Նախ՝ դեմ էին նախկին ժամանակավոր պաշտոնակատար Ստեփան Բաբաթորոսյանին, որը պատճառ հանդիսացավ նոր ընտրությունների։ Նախարարության ներկայացուցիչների ներկայությամբ ընտրվեց նոր Ժամանակավոր պաշտոնակատար՝ Աննա Կիրակոսյանը։ Հիմա կրկին նախարարությունը նոր պաշտոնակատար է նշանակել։

«Նոր ԺՊ-ի համար տեղ էին պահել, հող էին նախապատրաստում»,- «Փաստինֆո»-ի հետ զրույցում ասաց Աննա Կիրակոսյանը։ 

Նորանշանակ ժամանակավոր պաշտոնակատարի հրամանը նախարարությունը տվել է «մինչև տնօրենի ընտրությունը», իսկ նախկին ԺՊ-ին՝ Աննա Կիրակոսյանին հրաման են տվել՝ ժամկետային հիմունքներով՝ նախ մինչև հոկտեմբերի 21-ը, հետո մինչև նոյեմբերի 23-ը։ Ըստ Կիրակոսյանի՝ նշանակել են ԺՊ մի անձի, որը կազմակերպել է բողոք-գրություն իր դեմ։ Բողոքը գրել են մի ժամանակահատվածում, երբ իրեն չեն ճանաչել։

«Սարգսյան Արամն է նշանակվել ԺՊ։ Երբ բողոքն եկավ նախարարությունից, ես գրեցի պատասխան, աշխատակազմին ևս ներկայացրել եմ այդ բողոքը, բացի պարսավանքից, վատ բառերից, ուրիշ բանի չեն արժանացրել։ Նույն ժամանակ իմացա, որ նույն Արամ Սարգսյանը խաբեությամբ բողոքը գրելիս մարդկանցից կորզել է ստորագրություն։ Աշխատակազմը հետագայում նշեց, որ իմացել են, թե աշխատակիցներից մեկին աշխատանքի վերականգնելու համար են ստորագրում, իբր վերջինս վարկեր ունի դրա համար են ստորագրել։ Կազմակերպիչը, որը հետագայի հետ կապված հեռանկար է ունեցել, ինքը չի ստորագրել այդ բողոքի տակ»,- նշեց Կիրակոսյանը։

Քանի որ հաստատությունը նոր է՝ խորհուրդ պետք է լիներ, որ տնօրեն ընտրեր, սակայն խորհուրդ չձևավորելու պահանջ է եղել նախարարությունից։

«Խորհրդի ձևավորումը նախարարությունը արգելեց, չնայած նման իրավասություն չունեն, թույլ չեն տվել, որ ձևավորենք խորհրդի կազմը։ Ավելին, մանկավարժական խորհրդի նիստի ժամանակ նախարարությունից զանգահարել են, որ նիստի կառավարման խորհրդի անդամների ընտրության հարցը օրակարգից հանենք։ Ճիշտ է, անօրինական պահանջ էր դա, քանի որ լիազոր մարմինը իրավունք չունի խառնվելու դրան, բայց դա ևս արվել է։ Ենթարկվել ենք, դրանում որևէ բան չենք տեսել»։

Քոլեջից «Փաստինֆո»-ին տեղեկացրեցին, որ նոր ԺՊ-ն Ռոբերտ Ամիրխանյանի սանիկն է, ում նշանակման համար անձամբ է միջնորդել։ Ամիրխանյանն էլ աշխատում է քոլեջում ու ինչպես մեզ տեղեկացրեցին, երկու ամիս աշխատանքի չի ներկայացել և չի վճարվել։

«Ջազ քոլեջի 90 տոկոսը դեմ է տվյալ անձի պաշտոնավարմանը։ Նախարարությունը անօրինականություն է անում սեփական ամբիցիաներից ելնելով ու եթե նախարարը նույնիսկ հեռանում է, ապա որոշեց՝ «վերջին վատությունս անեմ, նոր գնամ»։ «Դա ենք հասկանում։ Ցանկացած պարագայում, երբ հնարավորություն են ունենում՝ իրենք խնամի, ծանոթ, բարեկամով են առաջնորդվում»,- ասացին քոլեջից։

Կիրակոսյանը նշեց, որ այս ցնցումները կատարվում են այն ժամանակ, երբ երկրում ծանր վիճակ է։

«Զարմացել եմ. մեր երկրի կարևորագույն խնդիրը ժամանակավոր պաշտոնակատար փոխե՞լն է և եթե փոխում են պատճառը ո՞րն է, ինչի՞ համար՝ թերացե՞լ եմ, ուսումնական պրոցես չի՞ կատարվել... նույն մաֆիան շարունակեց, հիմա ԺՊ են բերում այդ մաֆիայի անդամին, որը, վստահեցնում եմ, որ չի գործելու»,- ասաց բանախոսը։
Կիրակոսյանի փոխանցմամբ՝ ստիպված ու ամոթով դուրս են գալու ցույցի։ Իրավական ոլորտ դեռ չեն տեղափոխի հարցը, բայց կա պահանջ, կարծում է, այդպես էլ կլինի։

Աղբյուր` Փաստինֆո