Փաստ ինֆո

Փաշինյանը վերջին մի քանի օրերին օրակարգ է բերում կեղծ պնդումներ, որոնցով փորձում է պահել իր իշխանությունը : Նա ասում է, որ այստեղ հավաքված մարդիկ պայքարում են իշխանության համար, բայց այդպիսի բան չկա , ես պաշտոնապես հայտարարում եմ՝ մենք պայքարում ենք մեր հայրենիքի համար, սա քաղաքական պայքար չէ, սա պայքար է ապագայի համար,-այս մասին ընդդիմության հանրահավաքի ժամանակ հայտարարեց «Հայրենիք» կուսակցության ղեկավար Արթուր Վանեցյանը:

«Առաջիկա օրերին, երբ կանցնի էյֆրիան և սուտը, մենք կառերեսվենք իրականության հետ, մեզ սպասվում են շատ խնդիրներ, արդյո՞ք Նիկոլ Փաշինյանը, որ ձախողել է բոլոր ուղղություններով կարող է լուծել այս խնդիրները»,-ասաց Վանեցյանը:

Նա հիշեցրեց, որ դեռևս հունվար ամսին ինքը հանդես է եկել վարչապետի հրաժարականի պահանջով, որից հետո գրեթե բոլոր քաղաքական ուժերը միացել են այդ պահանջին.

«Մենք զգուշացնում էինք, որ Նիկոլ Փաշինյանի կողմից տարվող ներքին և արտաքին քաղաքականությունը բերելու է շատ ծանր հետևանքների մեզ համար, և այսօր արդեն ունենք այդ հետևանքները»,-հանրահավաքի ժամանակ ասաց Արթուր Վանեցյանը:

Նրա խոսքով՝ Նիկոլ Փաշինյանը փորձում է համոզել, որ եթե ինքը հրաժարական տա, ապա ստորագրված հայտարարությունը չեղարկվելու է, և պատերազմը վերսկսելու է, սակայն ընդդիմությունը պատերազմ սկսելու մտադրություն չունի.
«Պարտված առաջնորդը, այս ստորացուցիչ հայտարությունը ստորագրած առաջնորդը չի կարող ներկայացնել հայ ժողովրդի շահերը, նա չի կարող հայանպաստ որևէ կետ բերել,և որևէ նորմալ լուծումներ գտնել»:

Արթուր Վանեցյանի խոսքով՝ այս պատերազմը հրահրել է Նիկոլ Փաշինյանը՝ իր ապաշնորհ արտաքին քաղաքականությամբ.
«Փաշինյանն ասում է, որ ես պարտվել եմ պատերազմը, որ այսքան մարդ է զոհվել ոչինչ, բայց եթե ես գնամ, ինձ փոխարինելու են նախկինները: Սա կեղծ օրակարգ է, վերադարձ նախկինին չի լինելու, ներկան մերժվելու է, մենք գալիս ենք՝ նոր դեմքերով և նոր տեսլականով»:
ԱԱԾ նախկին ղեկավարը նաև նշեց, որ վերջին շրջանում ընդդիմադիրների և ակցայի մասնակիցների հանդեպ կրառած բռնի ուժը անթույլատրելի է և ոչ իրավաչափ:

Աղբյուր` Փաստինֆո