Փաստ ինֆո

«Ես հույս ունեմ, որ ՌԴ հետ Հայաստանի իշխանությունները գոնե այս ժամանակահատվածում, երբ դեռ ևս ստիպված հանդիսանում են իշխանություն, կկարողանան հայանպաստ պայմաններ ապահովել բանակցային գործընթացում»,-այս մասին հանրահավաքից հետո լրագրողների հետ զրույցում ասաց «Հայրենիք» կուսակցության ղեկավար Արթուր Վանեցյանը՝ անդրադառնալով ՌԴ բարձրաստիճան պաշտոնյաների այցին։

Վանեցյանը հիշեցրեց, որ մեկ անգամ չէ, որ նշել է՝ բոլոր նրանք, ովքեր համաձայնվում են այսօր հեռացող դավաճանական իշխանության հետ շարունակել այս պատասխանատվությունը վերցնել իրենց վրա, նրանք ուղղակի դավաճաններ են և կոչ է արել՝ որևէ նորմալ մարդու չհամաձայնել ստանձնել տարբեր պաշտոններ։

Արթուր Վանեցյանն ասաց, որ չի ուզում նկատել ՌԴ- կողմից կամ այլ երկրների կողմից աջակցություն ՀՀ իշխանություններին, ըստ նրա՝ մենք ինքնիշխան երկիր պետք է լինենք։ Իսկ Իջևանի այն դեպքերի մասին իր հայտարարությունների՝ վարչապետի կողմից ժխտվելու հավանականության մասին նշեց.

«Չեն կարող ժխտվել իմ ասածները։ Հավատացեք, ես կարող եմ ավելի մանրուքներով պատմել այդ դեպքի հետ կապված։ Հիշու՞մ եք Իջևանում եղավ այդ զանգվածային անկարգությունները և ես հայտնվեցի այնտեղ։ Շատերի կողմից քննադատություն կար, թե ինչ գործ ունի ԱԱԾ տնօրենը հասարակական վայրում կարգ ու կանոն ապահովելու հարցում։ Պարզ պատճառ կար՝ աշխատանքային այցով Արցախում էի։ Զանգահարեց Վալերի Օսիպյանը և ասաց՝ լարված է վիճակը Իջանում։ Այնուհետև զանգահարեց իմ տեղակալը՝ Էդուարդ Մարտիրոսյանը, որը հետագայում դարձավ ԱԱԾ տնօրեն, և ասաց, որ վարչապետը հանձնարարել է մեկնել Իջևան՝ «Ա» վարչության՝ ժողովրդի կողմից հայտնի Ալֆա ջոկատայիններին տանեն, որ ժողովրդին ծեծեն։

Ասացի նման բան չանեն, որովհետև այդ վաչությունը նախատեսված է այլ գործառույթներ իրականացնելու՝ հակաահաբեկչական գործողությունների համար։ Նիկոլ Փաշինյանը զանգում էր ինձ, Օսիպյանին, ասում էր ՝«ջարդեք, սատկացրեք, սպանեք, արյան գետեր եմ ուզում տեսնել»։ Ես գնացել եմ, պատասխանում էինք, որ չի կարելի։ Մեկնեցինք այնտեղ, իմ և Օսիպյանի աշխատանքի ընթացքում, որ չտրվեցինք ապօրինի հրամանների կատարմանը, չիրականացրեցինք և կարողացանք առանց գետերի կանխել այդ՝ իրականում ապօրինի գործողությունները, որ իրականացնում էին բնակիչները»։

Վանեցյանն ասաց,  որ ժամանակի ընթացքում ամեն ինչի մասին կխոսեն։ «ժամանակին, երբ ես տվեցի հրաժարական, որը խորը իմաստ ունեցող տեքստ էր։ Ինչ ասել եմ, ցավոք սրտի իրողություն է դառնում։ Կորցրեցինք Արցախի 70 տոկոսը, շուրջ 5000 զոհ ունեցանք, փլուզված տնտեսություն ունեցանք։ Նկատե՞լ եք դոլարի կուրսը ինչքան է դարձնել՝ 508 դրամ։ Երկիրը քանդվում է, էլ տեղ չունենք։ Եթե օդանավերը սկսեցին թռնել, երկրի 50 տոկոսը արտագաղթելու է։ Հասկանո՞ւմ եք ինչ է կատարվում»։

Աղբյուր` Փաստինֆո