Փաստ ինֆո

Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, հեռացել է խորհրդակցական սենյակ՝ ՀՀ ԱԺ աշխատակազմի նախկին ղեկավար Արա Սաղաթելյանի ձերբակալման իրավաչափության վերաբերյալ որոշում կայացնելու։ Այն կհրապարակվի այսօր՝ ժամը 20։00-ի սահմաններում։ Արա Սաղաթելյանի պաշտպան Հակոբ Ենոքյանը «Փաստինֆո»-ի հետ զրույցում ասաց, որ Արա Սաղաթելյանը դատական նիստին չի մասնակցել ։

Պաշտպանական կողմը չի ցանկացել հետաձգել նիստը՝ Արա Սաղաթելյանի մասնակցությունը դատական նիստին ապահովելու համար, քանի որ Արա Սաղաթելյանը դիրքորոշում հայտնել էր իր ցուցմունքով, լրացուցիչ ասելիք չկար։ 

Սակայն դատական նիստում հետաքրքիր դրվագներ են բացահայտվել։ Մասնավորապես՝ պաշտպանը նշեց, որ դատական նիստին քննիչի կողմից ներկայացված փաստաթղթերից պարզվում է, որ Ա.Սաղաթելյանին վերագրվում են ինչ-ինչ գործողություններ, որոնք, իբր, արդեն կատարվել են բերման ենթարկվելուց հետո։ Այսպես՝ ըստ փաստաթղթերի՝ Սաղաթելյանը բերման է ենթարկվել 15։00-ին, բայց մեկ այլ փաստաթղթով նշված էր, որ 15։10-ին ինչ-որ գործողություններ է կատարել, որի հիման վրա էլ ձերբակալել են։

«Բնականաբար չէր կարող ժամը 15։00-ին արգելանքի տակ գտնված անձն ինչ- որ գործողություններ անել ժամը 15։10-ին։ Դատարանի ուշադրությունը հրավիրեցինք այս հանգամանքի վրա, դատարանը հարցեր ուղղեց վարույթն իրականացնող մարմնին և հեռացավ խորհրդակցական սենյակ»,- նշեց պաշտպանը»

Ճշգրտող հարցին ՝ արդյո՞ք կեղծ տվյալներ են մտցվել՝ ձերբակալման հիմքեր ստեղծելու համար, պաշտպանը պատասխանեց, որ ոչ թե կեղծ տվյալներ, այլ՝ հնարավոր է, որ տարբեր ծառայողների կողմից կազմված փաստաթղթեր լինեն, որ ժամերը չեն համընկնում, բայց կա փաստ, որ 15։00-ին Արա Սաղաթելյանը բերման է ենթարկվել և դրանից հետո ինչ փաստաթուղթ էլ, որ կազմված լինի, առանց անդրադառնալու այդ փաստաթղթերի իրավաչափությանը, պետք է ընդունենք ոչ հավաստի։ Այսինքն՝ այն փաստաթղթերը, որոնք դրված են ձերբակալելու հիմքում, օրինակ՝ չթույլատրված արարք կատարելու հանգամանքը հիմնավորելու համար կամ փախուստը կանխելու համար, հավաստի չէ։ 

Ենոքյանը կարևորեց, որ դատական նիստում հիմնավորվել է, որ Արա Սաղաթելյանի կասկածանքի հիմքում դրված փաստական տվյալներն իրարամերժ են և բավարար չեն, որ հիմնավորեն նրա առնչությունն այն արարքին, որում նա կասկածվում է։ Բացի դա՝ Արա Սաղաթելյանի ձերբակալությունն իրավաչափ նպատակ չի հետապնդում, քանի որ նրան կալանավորելու միջնորդություն չեն կարող ներկայացնել, վերագրվող հոդվածը չի նախատեսում ազատազրկման ձեւով պատիժ, եւ ստացվում է, որ ինքնանպատակ, մարդուն երեք օր արգելանքի տակ են պահում։ Նրա խոսքով՝ այդ հանգամանքն ինքնին վկայում է ձերբակալման ոչ իրավաչափ լինելու մասին։

Անդրադառնալով բերման ենթարկվելուց հետո 3 ժամ անց ազատ չարձակվելու հանգամանքին՝ փաստաբանը նշեց, որ ժամը 15։00-ին եղել է արգելանքը, 17։50-ի սահմաններում ոստիկանության բաժանմունքից դուրս են եկել և գնացել Երևան քաղաքի վարչություն, մոտավորապես 1,5 սպասել են մինչև քննիչը հրավիրի։ Փաստաբանը վստահեցրեց, որ ցանկության դեպքում կարող էին հեռանալ այդտեղից, պարզապես Արա Սաղաթելյանը իրավահպատակ վարքագիծ դրսևորեց և չհեռացավ, ինչը նաև դատարանում է ներկայացվել։

«Եթե նա փախուստի դիմելու ցանկություն ունենար, նա 1,5 ժամ ազատության մեջ էր, հնարավորություն ուներ, կարող էր հեռանալ, բայց նա սպասեց քննիչի հրավերին՝ հենց Երևանի քննչական վարչության վարչական շենքի մոտ»,- նշեց Ենոքյանը՝ հավելելով, որ որևէ մեկը Արա Սաղաթելյանի տեղաշարժը չէր սահմանափակել, ոչ ոք չէր հետևում տեղաշարժին։

Ինչպես արդեն տեղեկացրել ենք Սաղաթելյանը ձերբակալվել է Քննչական կոմիտեում քննվող քրեական գործով՝ ՀՀ քրեական օրենսգրքի 225.1-րդ հոդվածի կասկածանքով՝ օրենքով սահմանված կարգի խախտման հավաքներ կազմակերպելու համար։

Ավելի վաղ տեղեկացրել ենք, որ Հայաստանի տարբեր մարզերում և մայրաքաղաք Երևանում բազմամարդ ակցիաներ են իրականացվում՝ կապիտուլյացիայի և Արցախը Ադրբեջանին հանձնելու մասին հայտարարություն ստորագրած Նիկոլ Փաշինյանի հրաժարականի պահանջով՝ իրենց անհամաձայնությունը հայտնելով Փաշինյանի դավաճանական գործողություններին։ Իշխանությունները բողոքի ակցիաները ճնշելու համար անցել են բիրտ գործողությունների։

Քրեական գործեր են հարուցվել նաեւ ՀՔԾ-ում, որի շրջանակներում մեղադրանք են առաջադրվել մի շարք քաղաքական գործիչների՝ Արթուր Վանեցյանին, Իշխան Սաղաթելյանին, Արսեն Բաբայանին, Գեղամ Մանուկյանին և մի շարք այլ գործիչների, և արդեն ՔԿ-ում ՝ ՀՀ քրեական օրենսգրքի 225․1-րդ հոդվածի 1-ին մասի հատկանիշներով:

Հեղինակ՝ Իզաբել Սահակյան

Աղբյուր` Փաստինֆո