Փաստ ինֆո

Նիկոլ Փաշինյանը ձախողել է բոլոր ուղղությունները՝ առողջապահական, տնտեսական, արտաքին քաղաքականության, պաշտպանական, անվտանգային։ 2,5 տարին բավարար ժամանակ է, որ իշխանության եկած անձը կամ ուժը ձեռնարկի բոլոր միջոցները՝ երկիրը նորմալ զարգացման տանելու համար։ Այս մասին «5-րդ ալիք»-ի եթերում ասել է ԱԱԾ նախկին տնօրեն, «Հայրենիք» կուսակցության ղեկավար Արթուր Վանեցյանը։

«Չկա մի ոլորտ, որտեղ Նիկոլ Փաշինյանի իշխանությունն ունենա հաջողություն, բոլոր ոլորտներում ունենք ձախողումներ»,- ասաց Վանեցյանը՝ հավելելով, որ 44 օր շարունակ առավոտից գիշեր ֆեյսբուքյան նույն տիրույթում մատուցում էին սուտ։

Նրա խոսքով՝ սուտ մատնության հատկանիշներով գործ պետք է հարուցվի Նիկոլ Փաշինյանի և մնացած պաշտոնյաների համար, որովհետև նրանք 44 օր անընդմեջ ստել են և, եթե որևէ մեկը փորձում էր հանրությանը ներկայացնել իրական պատկեր՝ կոչում էին ամենավերջին բառերով՝ սկսած դավաճանից։

Հարցին՝ ինչու էին 44 օր ստում, Վանեցյանը պատասխանեց՝ նշելով, որ երկրի ղեկավարի պաշտոնը զբաղեցնող անձը խրոնիկ սուտասան է, նա ամեն տեղ ստում է, մինչև հիմա ստում է, բերում՝  կեղծ օրակարգեր։ Վանեցյանի խոսքով՝ իր պարտությունը, որը փաստ է, ունենք ստորագրված խայտառակ կապիտուլյացիոն հայտարարություն, նա փորձում է ներկայացնել ստի միջոցով, որ դա էր միակ ելքը։

«Հարց է առաջանում՝ ինչու նման հանգրվանի մենք եկանք՝ կառավարում, դիլետանտները և որևէ կառավարման բացակայություն։ Այս մարդիկ պետության և պետականության հետ որևէ կապ չունեն, չեն ունեցել և ցավոք սրտի չեն էլ սովորել և ցանկություն էլ չունեն սովորելու»,- ասաց Վանեցյանը՝ նշելով, որ պարտությունն ապաշնորհ կառավարման հետևանք էր, բայց ապաշնորհ կառավարումն արդեն դավաճանություն է և, եթե դու չես կարողանում կառավարել, հասկանում ես, որ ի վիճակի չես այս բարդ իրավիճակում երկիրը կառավարելու, պետք է ազնվորեն կանգնել հանրության առջև և ասել։

Բացի դա՝ բազմիցս է հայտարարվել է, որ Նիկոլ Փաշինյանի կողմից տարվող ապաշնորհ և ապիկար արտաքին քաղաքականության արդյունքում ունենալու ենք պատերազմ։ Վանեցյանը ինչպես նախկինում, այդպես էլ այսօր շարունակում է պնդել,որ պատերազմ մեզ պետք չէր և, որ հնարավոր էր հարցը լուծել դիվանագիտական ճանապարհով, մինչդեռ Նիկոլ Փաշինյանն իր յուրաքանչյուր քայլով տանում էր պատերազմի։

Աղբյուր` Փաստինֆո