Փաստ ինֆո

«Եթե կեղծ է, ապա պետական գաղտնիք չէ, եթե պետական գաղտնիք է, ուրեմն կեղծ չէ, պետք է կողմնորոշվեն ո՞րն է ճիշտ,- այս մասին «Արմնյուզին» տված հարցազրույցում նշել է Արցախի հերոս, գեներալ-գնդապետ, Արցախի ՊԲ նախկին հրամանատար, Հայաստանի ԶՈՒ գլխավոր շտաբի նախկին պետ, Մովսես Հակոբյանն՝ անդրադառնալով երեկ ՊՆ-ի պարզաբանմանը՝ իր աղմկահարույց հայտարարություններին։

Գտնում է, որ հայրենիքն իր համար ավելի թանկ է, պատրաստ է կրել պատասխանատվություն։ Նշել է, որ ուղերձը ուղղված է իշխանավորներին, որպեսզի շտկվեն թերությունները։

«Միանշանակ ոչ։ Եթե ինչ որ խանգարիչ դերակատարություն ունեցել է կոնկրետ այդ պահի համար առաջին տիկնոջ ներկայությունը, խնդրել եմ դուրս գալ»,- ասաց Մովսես Հակոբյանը՝ անդրադառնալով Աննա Հակոբյանի մասին արված իր հայտարարությանը։ Իսկ թե Նիկոլ Փաշինյանի տիկինը Արցախում ղեկավարե՞լ է գործողություններ, հրահանգներ տվե՞լ է գեներալիտետին, ԶՈՒ գլխավոր շտաբի նախկին պետը  նշեց, որ դա անհեթեթություն է։ Մովսես Հակոբյանի խոսքով, ինքը ընդամենը մեկ անգամ է հրամանատարական կետում տեսել Աննա Հակոբյանին։

«Թե ով իրավունք ունի մուտք գործել, որոշում է բանակի հրամանատարը: Հրամանատարական կետում եղել են և քաղաքական իշխանությունից մարդիկ, որոնք նախկինում զինվորական ծառայությունում են եղել, տարբեր կատեգորիայի մարդիկ եղել են»,-ասաց Հակոբյանը։

Մովսես Հակոբյանը նաև կարծում է, որ ճիշտն այն է , որ պաշտոնաթող որոշ գեներալների ևս թույլ չեն տվել  ներս մտնել, իրեն էլ՝ այդ թվում։ Դա այդպես պետք է լինի։  

«Շատ ճիշտ են արել, որ թույլ չեն տվել մտնել: Ինձ էլ չեն թույլ տվել, ու ճիշտ են արել: Բանակի հրամանատարը խորհրդականի պաշտոն չունի, եթե դրա անհրաժեշտությունը լիներ, ապա հաստիքով կնախատեսվեր նման պաշտոն: Խորհրդական կարող է ունենալ պաշտպանության նախարարը, իսկ հրամանատարը կամ ԳՇ պետը չի կարող ունենալ»,- ասաց Հակոբյանը։

Հարցին՝ սպառազինության ձեռքբերման պլանի փոփոխությունները 2018-ից հետո՝ ՀՕՊ-ի փոխարեն կործանիչ ավիացիա գնելը անդրադարձե՞լ է պատերազմի ելքի վրա՝ ասաց այո և շատ լուրջ։ Նա հավելեց, որ դրանք որևէ թռիչք չեն կատարել, որպես կործանիչ ավիացիա ևս դա չի կիրառվել։ Մովսես Հակոբյանը տեղեկացրել էր ըստ տարեթվերի, թե երբ ինչ զենք է գնվել՝ զենքի գնումը տևում է պայմանագրի կնքումից մինչև զենքի մատակարարումը կարող է տևել մինչեւ 2 տարի:

Ինչ վերաբերում է նրան, որ «ՍՈՒ 30» է գնվել, որի սպառազինությունը չի եղել, Մովսես Հակոբյանն ասաց, որ բարեբախտաբար «ՍՈՒ 30»-ը կարող է օգտագործել նաև հին սպառազինություն։

«Բայց «ՍՈՒ 30»-ը չեն առնում, որ ոչ կառավարվող հրթիռ տանի ինչ-որ տեղ գցի, որի ճշգրտությունը շատ հեռու է լինելու: Այդ ինքնաթիռը ունակ է գերճշգրիտ զինատեսակ կրելու եւ դրանով խոցելու, բայց այդ սպառազինությունը ես համոզված եմ, որ չի եղել»:

Ըստ նրա՝ պետք էր գնահատել հավանական գործողությունները, թե որ ուղղությամբ եւ միանգամից ինչ քանակով կարող է լինել եւ պլանավորել դրա խոցումը։
«Մենք պարտվել ենք, ոչ թե ՀՕՊ-ի ձախողման համար, այլ մեր բանակը սխալ պատրաստելու հետեւանքով»,- ընդգծեց Հակոբյանը։

Ըստ նրա լրահամալրումը չի դադարել, զորակոչը իրականացվել է, բայց այլ նպատակներով, նրանց հետ չեն եղել զինվորական գործից հասկացող հրամանատարներ։

Աղբյուր` Փաստինֆո