Փաստ ինֆո

«Իրավական ուղի» ՀԿ համահիմնադիր Ռուբեն Մելիքյանը և իրավապաշտպան Թամարա Սիմոնյանը գտնվում էին Ոստիկանության Արաբկիրի բաժնում՝ իրավաբանական օգնություն տրամադրելու այն մարդկանց, որոնք բերման են ենթարկվել՝ հանրային վայրերում իրենց բողոքի ձայնը բարձրացնելու ժամանակ։

«Այստեղ ենք հայ ժողովրդի արժանապատվությունը պաշտպանելու համար։ Այն բանի  համար, որ մենք դեմ ենք արժանապատվության նվաստացմանը։ Այն մարդիկ, որոնք մեր ժողովրդի արժանապատվությունը նվաստացնելու և թշնամու առջև ծնկելու հեղինակը դարձան,  նրանք չպետք է  շարունակեն պաշտոնավարումը»։

Իրավապաշտպանը նշեց, որ փողոց փակելը Հայաստանում որպես գործողություն սկսել է 2018 թվականից և իրավաչափ արտահայտման ձև է համարվում, իսկ հիմա պատճառաբանում են, թե ռազմական դրություն է գործում.

«Բոլորիս համար հասկանալի է, որ դրա միակ նշանակությունը բողոքի և ընդվզման ալիքները ճնշելն է։ Բացարձակապես ոչ իրավաչափ է պահպանել ռազմական դրությունը»,- ասաց Մելիքյանը, և հիշեցրեց, որ երեկ ապշած էին, պարզելով, որ դրա բուն նպատակը պատերազմի ժամանակ չի կատարվել։

«Սրանք հուսահատ փորձեր են, ռեպրեսիվ փորձեր են այն մարդկանց կողմից, որոնք իրենց համարում էին որպես ժողովրդավար, երբևէ ՀՀ-ում այս աստիճան բռնապետական ճնշումներ չեն եղել։ Խոսքի ազատության, հավաքներ անցկացնելու նկատմամբ»։

Մելիքյանը տեղեկացրեց, որ ոստիկանության բաժնում էին տասնյակ մարդիկ, որոնց ներսում չէին կարողանում տեղավորել։

«Սա խայտառակություն է։ Սա՝  ոչ թե վարչական ձերբակալում էր, այլ քրեական դատավարության շրջանակներում իրենց կողմից մտցված 225.1 հոդվածով ռազմական դրության ժամանակ հավաքներ կազմակերպելը։

Իմ տեղեկությունով շատերը այդ հոդվածով են ազատությունից զրկվել։ Նրանք տեղափոխվում են Երևանի Քննչական վարչություն, որպեսզի գործը հանձնեն քննչական մարմիններին, նրանք որոշեն ինչպիսի ընթացք են տալիս գործին»,- ասաց Մելիքյանը։

Աղբյուր` Փաստինֆո