Փաստ ինֆո

ԵՊՀ գիտխորհուրդն ընդունել է հայտարարություն, որով պահանջում է վարչապետի  և կառավարության հրաժարականը։ Հանձնաժողովի կազմում է եղել նաև ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը։

«Փաստինֆո»-ի հետ զրույցում Ռուբեն Մելքոնյանը նկատեց՝ ԵՊՀ-ն որպես Հանրապետության և ժողովրդի ամենակարևոր գիտակրթական հարթակ, մեր պետականության համար կարևոր հարցերի շուրջ կարծիք արտահայտելու առաքելություն ունի. «Ըստ էության ԵՊՀ-ն իր առաքելությունից բխող քայլ է արել և գնահատական է տվել իրավիճակին։ Մենք պատրաստել ենք տեքստ, որն ուներ հետևյալ տրամաբնությունը՝ գնահատական տալ պատճառներին, այն ամենին, ինչ բերեց այսօրվան, գնահատական տալ այսօր ստեղծված իրավիճակին և առաջարկել այս պահին լուծումը, ելքը, որը հետո կտանի դեպի իրավիճակի կայունացում։ Շատ լակոնիկ գնահատական ենք տվել պատճառներին, ինչպես նաև ստեղծված իրավիճակին, որի մեջ առանձնացրել ենք նաև ոչ կոմպետենտ քաղաքական կառավարման ոճը, ոչ կոմպետենտ պաշտոնյաների ներկայությունը կառավարման համակարգում և որպես այս ամենի հետևանք կոչ ենք արել և պահանջել ենք, որ այս կառավարությունը հրաժարական տա»,-ասաց Ռուբեն Մելքոնյանը՝ ընդգծելով, որ սա քաղաքական օրինաչափություն է, քանի որ բոլոր ժամանակներում աշխարհի բոլոր երկրներում հրաժարական են տվել։ ԵՊՀ գիտխորհուրդն այս հայտարարությամբ դիմել է նաև ԱԺ-ին, որպեսզի պատգամավորներն առաջնորդվեն ոչ թե կուսակցական, քաղաքական շահերով, այլ պետականության կարևոր շահերով։

Ինչ վերաբերում է հետագա գործողություններին՝ Ռուբեն Մելքոնյանը նշեց, որ ԵՊՀ-ն գիտակրթական մարմին է և այս հայտարարությունն ուղղված է հանրությանը, քաղաքական շրջանակներին և գործողություններ պետք է անեն իրենք. «ԵՊՀ-ն արել է իր քայլը և հանդես եկել իր մասնագիտական գնահատականով։ ԵՊՀ-ն արել է իր պարտքը հանրության, պետականության ու մասնագիտական բարոյականության առջև»,-ասաց Ռուբեն Մելքոնյանը։

Հարցին՝ հետևողական կլինե՞ն, որ հայտարարությունն արձագանքներ գտնի համապատասխան մարմիններում, Ռուբեն Մելքոնյանը դրական պատասխան տվեց և ընդգծեց՝ հայտարարությունը պատկանում է ԵՊՀ-ին և կառույցը հետամուտ կլինի այնպես, ինչպես ՀՀ ցանկացած քաղաքացի և կառույց, որը մտահոգված է երկրի խնդիրներով. «Անպայման հետամուտ ենք լինելու այս իրավիճակի բարելավմանը, կարգավորմանն ուղղված ցանկացած քայլի»,-եզրափակեց Ռուբեն Մելքոնյանը։

ԵՊՀ գիտխորհուրդը որոշում է ընդունել և պահանջում է վարչապետի եւ կառավարության հրաժարականը

Հիշեցնենք՝ ԵՊՀ գիտխորհուրդն այսօր հայտարարել է, որ նոյեմբերի 9-ին խիստ գաղտնիության պայմաններում և հասարակության սպասելիքներին հակադիր ստորագրված եռակողմ հայտարարությունը հասարակության շրջանում առաջացրել է  խորը ճգնաժամ, խիստ լարված մթնոլորտ, իսկ դրա հետևանքով օրըստօրե խորացող անջրպետները և երկպառակությունները կարող են կործանարար լինել պատերազմի արհավիրքի հետ բախված մեր պետականության համար։ Ընդգծել, որ ստեղծված պայթյունավտանգ իրավիճակում իշխանությունների գործողությունները, սեփական սխալների և քաղաքական պատասխանատվության մերժումը ոչ միայն չեն նպաստում լարվածության թուլացմանը, այլև էլ ավելի են բորբոքում կրքերն ու շիկացնում ներքաղաքական մթնոլորտը։

«Այս ամենի հետևանքով մեր պետականության ճակատագիրը և ապագան էականորեն վտանգված են, ուստի Երևանի պետական համալսարանի գիտական խորհուրդը պահանջում է վարչապետի և կառավարության հրաժարականը, Ազգային համաձայնության ժամանակավոր կառավարության կազմավորում` բաղկացած բացառապես պրոֆեսիոնալներից, համապատասխան ոլորտների մասնագետներից»-, նշված է հայտարարության մեջ։

Աղբյուր` Փաստինֆո