Փաստ ինֆո

2018թ մայիս ամսից սկսված ես՝ որպես ԱԱԾ տնօրեն պարբերաբար զեկուցել եմ Նիկոլ Փաշինյանին, այդ թվում՝ ԱԽ անդամներին, որ հայկական բանակն այսօր հնարավոր սկսվող պատերազմի դեպքում պետք է պատրաստ լինի պայքարել թուրք-ադրբեջանական ԶՈՒ-երի դեմ և բանակի մարտունակության մասին օբյեկտիվ տեղեկություններ մշտապես զեկուցվել է Նիկոլ Փաշինյանին։ Այս մասին «5-րդ ալիքի» եթերում հայտարարել է ԱԱԾ նախկին տնօրեն, «Հայրենիք» կուսակցության ղեկավար Արթուր Վանեցյանը։ 

Այլ խոսքով՝ 2018թ մայիս-հունիս ամիսներին Նիկոլ Փաշինյանն իմացել է մեր բանակի իրական վիճակը։

«Ես չեմ ասում, որ բանակը եղել է անմխիթար վիճակում, քավ լիցի, նման բան չկա, բայց ժամանակակից աշխարհում, զարգացող աշխարհում նոր սպառազինությունների ամենօրյա, ամենամսյա վերազինման ժամանակ կամ հայտնության ժամանակ, պետք է բանակը կարողանանք համապատասխան ձևով մոդեռնիզացնել։ 2,5 տարի ժամանակը բավականաչափ էր այդ հարցը լուծելու համար։ Ինչն էր ամենամեծ խնդիրը՝ օդը։ Մենք պարտվել ենք բացառապես օդն անպաշտպան լինելու հետևանքով»,- նշեց Վանեցյանը՝ հավելելով, որ օդի պաշտպանության հարցը բարձրաձայնվել է բազմիցս և այն գումարները, որոնք ծախսվել են անիմաստ այս կամ այն բաների վրա, այդ թվում՝ Սու-30-ների վրա, կարող էին գնել այնպիսի սպառազինություն, որ մեր օդը 100 տոկոսով փակ լիներ։

Վանեցյանը նշեց, որ ՍՈՒ-30-ների գնմանը դեմ է եղել և այդ մասին կան համապատասխան զեկույցներ։

«Այն գումարները, որոնք ծախսվել են ֆեյսբուքով հրապարակումներ անելու համար և պոպուլիստական նպատակներով, կարող էին ծախսվել հակաօդային միջոցներ գնելու համար և այսօր չէինք ունենա այն պատկերը, որն ունենք։

Այն, որ զինվորը պետք է լավ սնվի բանակում, ոչ ոք չի հերքում, բայց պետք է տարբերել առաջնայինը երկրորդայինից։ Իմ հրաժարականի տեքստում կհիշեք, որ ասում եմ՝ առաջնայինը երկրորդայինից չի տարբերում այս մարդը, ուղղակի չի տարբերում։ Ելակը կամ ներքնաշորը բանակի մարտունակությունը չի բարձրացնում, ցավոք սրտի։ Ելակով կամ ներքնաշորով բանակդ չի դառնում ավելի ուժեղ, դա խնդիր է, որը պետք է լուծվի, բայց պետք է հաշվարկել բոլոր ռեսուրսները, բոլոր ռիսկերը և որոշում կայացնել, թե որն է ավելի կարևոր»,- նշեց Վանեցյանը։

Աղբյուր` Փաստինֆո