Փաստ ինֆո

Եռակողմ փաստաթղթի համաձայն՝ թշնամուն հանձնվող տարածքների բնակիչներին տարհանելու, նրանց կացարաններով ապահովելու համար Արցախի Հանրապետությունում ստեղծվել է աշխատանքային խումբ։

«Փաստինֆո» -ի հետ զրույցում ԱՀ Ազգային ժողովի «Ազատ հայրենիք-ՔՄԴ» խմբակցության պատգամավոր Արամ Հարությունյանը նշեց, որ ԱՀ տարածքային կառավարման և ենթակառուցվածքների նախարարի գլխավորությամբ ստեղծվել է աշխատանքային խումբ, որն ընդունում, գրանցում է այն մարդկանց, ովքեր կորցրել են իրենց տունը։
«Այժմ Ստեփանակերտի հյուրանոցներում ենք մարդկանց տեղավորում, և գրեթե բոլոր հյուրանոցները զբաղված են։ Նախատեսվում է, որ քաղաքի որոշ դպրոցներում համապատասխան պայմաններ են ստեղծվելու, որպեսզի այդտեղ ևս մարդիկ ժամանակավոր բնակվեն, մինչև սկսենք հիմնական կացարանների հարցը լուծել»,-ասաց պատգամավորը։

Նրա խոսքով մարդկանց որոշ մասը, որոնք հնարավորություն ունեն ՀՀ-ում մնալու, այժմ այնտեղ են, բայց իրենց տվյալները գրանցում են, որպեսզի հետագայում կացարաններով ապահովելու գործընթացում նրանք ևս ներգրավված լինեն։ Արամ Հարությունյանը նշեց, որ Հայաստան եկող մարդկանց կացարան ապահովողը ՀՀ-ն է. «Մեր Աշխատանքի և սոցիալական հարցերի նախարարությունն էլ է աշխատում, նախարարն ընդգրկված է այդ խմբում, բայց հիմնական գործառույթը Հայաստանի Աշխատանքի և սոցիալական հարցերի նախարարության վրա է»,-նշեց պատգամավորը։

Անդրադառնալով Հադրութի շրջանի Տող գյուղում գտնվող «Կատարո» գինու գործարանին, որը մնալու է թշնամու հսկողության տակ, Արամ Հարությունյանն ասաց, որ քարտեզով այդպես է, բայց մանրամասներին չի տիրապետում։

Հարցին՝ տեղահանվածների փոխհատուցման և նրանց կացարանային, սոցիալական խնդիրները երկարաժամկետ լուծելու վերաբերյալ օրենսդրական նախաձեռնություններով հանդես գալի՞ս են, պատգամավորը նշեց. «Այս պահին կոնկրետ բան չկա, որ կարող եմ ասել։ Տարբեր նախագծեր կան, որ քննարկվում են, բայց այս պահինս դեռ հստակ ոչինչ չկա։ Երևի մոտ օրերին արդեն կներկայացնենք ԱԺ-ի՝ ապագայի համար ռազմավարական քարտեզը»,-եզրափակեց ԱՀ ԱԺ պատգամավորը։

Աղբյուր` Փաստինֆո