Փաստ ինֆո

ՀՀ կառավարությունն ուզում է օգնել և միանվագ գումարներ տալ Արցախից եկած ընտանիքներին։ Եթե մենք այդ ընտանիքներին չապահովենք իրենց եկամտի աղբյուրներով, ապա նրանք անընդհատ կմնան պետության հույսին և պետությանը լրացուցիչ կծանրաբեռնենք սոցիալական վճարներով ու ծրագրերով։ «Փաստինֆո»-ի հետ զրույցում այս մասին ասաց Հայաստանի գործատուների միության նախագահ, տնտեսագետ Գագիկ Մակարյանը։

«Եթե կան հողակտորներ, որոնք կարելի է տրամադրել, ապա պետք է շատ արագ դա անել և օգնել մարդկանց, որ տուն կառուցեն, բայց այդ հողակտորը նաև մարդկանց համար պետք է որոշակի ապրուստ ստեղծի։ Ընդ որում` չափի առումով այն տրամաբանություն պետք է ունենա։ Այսինքն` ոչ թե օրինակ պետք է 200 մ լինի, այլ կարող 1000 մ, որ կարողանան այդ տարածքում այգի, ծառեր տնկել, որ հետագայում կարողանա մարդ իր գլուխը պահի»,-ասաց Գագիկ Մակարյանը՝ հավելելով, որ հակառակ դեպքում այդ բոլոր մարդիկ կմնան պետության հույսին։ Տնտեսագետը նկատեց՝ Հայաստանում տարիներ առաջ, երբ փախստականներ եկան, նրանց մի մասը հետագայում Ռուսաստան գնաց, բայց այստեղ մնացած մարդկանց մեջ կան ոմանք, որ մինչև վերջին օրերս ապրելու հնարավորություններ չունեն։
Գագիկ Մակարյանը գտնում է՝ Հայաստանում և Արցախում սոցիալական բնակարանաշինություն պետք է խթանվի, որ պետությունը բնակարաններ կառուցի և թեկուզ սիմվոլիկ գումարով վարձակալության տա այդ մարդկանց։

«Պետական քայլերը հիմա պետք է նման ուղղություններով գնան, եթե ոչ, այս մարդիկ կցրվեն։ Մի մասը կգա Հայաստան այստեղ կմնա, մյուս մասը կգնա Ռուսաստան կամ ուրիշ երկիր, ինչպես նախկինում է եղել։ Արդյունքում կկորցնենք մարդ, որը դեմոգրաֆիական խնդիրներ է կարգավորում, գնողունակություն պահում և մարդ, որը կարող է ինտելեկտով մասնակցել պետության զարգացմանը։ Մենք պետք է նախկին սխալները թույլ չտանք։ Եթե ամիսներով ուշանանք, այս մարդիկ կհեռանան»,-ասաց Գագիկ Մակարյանը՝ նշելով, որ միանվագ 300 հազար դրամը հարց չի լուծելու։

Տնտեսագետի խոսքով Աշխատանքի և սոցիալական հարցերի նախարարության զբաղվածության ծրագրերը հնարավորություն չունեն այդքան մարդու աշխատանքի տեղավորելու։ «Հայաստան» համահայկական հիմնադրամի գումարները կարող են այդ նպատակով ծախսել։ Գագիկ Մակարյանը կարծում է՝ ներկայիս պլանավորումները պետք է փոխվեն։

«Արցախի ճանաչումը կարևոր է նաև այն առումով, որ Արցախը կստանա երկրի շտրիխ կոդը, որով իր ապրանքները կարտահանի։ Այսօր Արցախը Հայաստանով է արտահանում։ Հայաստանը պետք է հաշվարկի իր տնտեսությունը և հասկանա՝ ինչքան բան կարող է Արցախից գնել։ Մեզ մոտ նույնիսկ դա պլանավորված չէ։ Հիմա 2021թ.-ի բյուջեն է մշակվում, բայց այն շատ պասիվ, պահպանողական է, որովհետև ծախսերը հետո ուղղվելու են դեպի սոցիալական աջակցությունները»,-ասաց Գագիկ Մակարյանը՝ հավելելով, որ եթե լոկոմոտիվային ոչ մի բան չենք նախաձեռնում, մեր տնտեսությունը էլի դանդաղ զարգացող մակարդակի վրա ենք թողնում, ինչի արդյունքում մեկ տարի էլ ենք կորցնելու»։

Աղբյուր` Փաստինֆո