Փաստ ինֆո

«Իմ քայլը» խմբակցության պատգամավորները հանդիպել են ՀՀ վարչապետի հետ։ Կառավարությունում էին այն պատգամավորները, որոնք աշխատանք են իրականացնում արտաքին ուղղությունների շրջանակում, քննարկել են արտաքին օրակարգին վերաբերող հարցեր։ 

Քիչ առաջ հանդիպումն ավարտվեց և պատգամավորներն արդեն դուրս են գալիս կառավարության շենքից։

ԱԺ «Իմ քայլը» խմբակցության պատգամավոր Արման Եղոյանը լրագրողների հետ զրույցում ասաց, որ քննարկել են ներքաղաքական, արտաքին քաղաքական հարցեր։

Հարցին՝ ՀՀ վարչապետի կնոջ՝ Աննա Հակոբյանի հետ ևս հանդիպե՞լ են, պատգամավորն ասաց. «Ոչ, չեն ունեցել հանդիպում։ Ես «Իմ քայլ»-ից եմ և տեղյակ չեմ նման հանդիպումից»,-ասաց Արման Եղոյանը։

Անդրադառնալով հարցին՝ արդյոք Մովսես Հակոբյանի հայտարարությունների վերաբերյալ քննարկում եղե՞լ է, Արման Եղոյանն ասաց. «Ոչ, հանդիպումն արտաքին քաղաքական բլոկով էր։ Որոշ ներքաղաքական հարցեր, բայց հիմնականում արտաքին քաղաքական հարցեր էին քննարկվում։ Խոսում էինք խորհրդարանական դիվանագիտությունից, Արցախյան հիմնախնդրի առկա վիճակից, ձևաչափերից և հարակից այլ թեմաներից։

Աշխատանքային քննարկում էր, վարչապետը ցանկանում էր լսել մեր տեսակետները, մենք էլ ցանկանում էինք իր տեսակետը լսել։ Այնպես չէ, որ բացառիկ հանդիպում է։ Հաճախ ենք հանդիպումներ ունենում»,-ասաց պատգամավորը։

Հիշեցնենք, որ Թելեգրամի ալիքներից մեկում տեղեկություն էր հայտնվել, որ Նիկոլ Փաշինյանի տիկին Աննա Հակոբյանը կառավարության շենքում ընդունում է «Իմ քայլի» պատգամավորներին և մի քանի ԶԼՄ-ների ղեկավարների: Վարչապետի մամուլի խոսնակ Մանե Գևորգյանը «Փաստինֆո»-ի հետ զրույցում տեղեկությունը չհաստատեց, նշելով, որ ինքը Աննա Հակոբյանի խոսնակը չէ։

Կառավարությունում էին ԱԺ «Իմ քայլը» խմբակցության պատգամավոր Ռուբեն Ռուբինյանը, Ալեքսեյ Սանդիկովը, Արման Եղոյանը, Հայկ Կոնջորյանը և Սիսակ Գաբրիելյանը:

Աղբյուր` Փաստինֆո