Փաստ ինֆո

«Ցավոք սրտի, կոռուպցիայի կանխարգելման հանձնաժողովի բարեվարքության կոնցեպտը պաշտոնատար անձանց վարքագծին չի առնչվում»,- այս մասին «Փաստինֆո»-ի հետ զրույցում հայտնեց հանձաժողովի նախագահ Հայկուհի Հարությունյանը՝ անդրադառնալով վարչապետի՝ «Վերջնականորեն լուծելու պատերի տակ վնգստացողների հարցերը» արտահայտությանը։

«Փաստինֆո»-ն դիմել էր հանձնաժողովին` պարզելու, թե արդյոք պատրաստվում են հանձնաժողովում քննարկել Փաշինյանի վարքագիծը, օգտագործվող բառամթերքը, որքանով է այն հարիր բարձրաստիճան պաշտոնյային:

Ըստ նրա՝ կոնկրետ բարեվարքության ներքո ավելի շատ հանձնաժողովը դիտարկում է շահերի բախման, անհամատեղելիության, կոռուպցիայի այլ դրսևորումների, այդ թվում օրինակ՝ հավասարության պայմանների խախտմամբ այս կամ այն սուբյեկտին արտոնություն տրամադրելու, կամ հակառակը՝ մյուսին ավելի թերի պայմաններուով օժանդակելու և այլ գործողությունները, որոնք ավելի շատ իրենց մեջ պարունակում են օրենքից դուրս գործելու հնարավոր ռիսկերը։

«Դրանք քաղաքական հայտարարություններ են, դիսկուսը, որը ընթանում է զուտ քաղաքկան հարթակում, ցավոք սրտի, հանձնաժողովը դրան միջամտելու որևէ հնարավորություն չունի։ Անկեղծ ասած նպատակային էլ չի լինի։ Այսինքն, քաղաքական դեբատը որևէ ձևով հանձնաժողովի գործառույթների հետ առնչություն չպետք է ունենա»,- ասաց Հարությունյանը։

Ըստ հանձնաժողովի նախագահի՝ իհարկե կարող է բացառություն կազմել քաղաքական կոռուպցիայի հետ կապված հարցերը, որոնք վերաբերվում են հենց հավասարության մրցակցության կոնկրետ ուժի կողմից ռեսուրսի տնօրինման կամ այդ ռեսուրսի հնարավոր չարաշահումների վերաբերյալ ռիսկերին և այլն։

«Այս պահին նման տեսակի հայտարարությունների համար հանձնաժողովը որևէ ձևով հնարավորություն չունի մասնակցելու։ Այդ մակարդակով քաղաքական պաշտոն զբաղեցնող անձի բարեվարքությունը քաղաքական խոսքի տեսանկյունից գնահատելը լրիվ այլ տեսակի գործառույթ ունեցող մարմնի լիազորությունների ներքո պիտի լինի, եթե նման բան լինի»։

Հարցին՝ ԲԴԽ նախագահի հայտարարությունից հետո վարչապետի գրառումն արդեն քաղաքական դիսկո՞ւս է, Հարությունյանը պատասխանեց.

«Վարչապետը հանդես է եկել պաշտոնապես վարչապետի տիտղոսը կրող պաշտոնական էջով։ Այդտեղ զուտ խոսքի բարոյականության և այլ հատվածները միանշանակ իհարկե տարբեր գնահատականների ենթակա պիտի լինեն, բայց հանձնաժողովի մանդատի ներքո զուտ բարեվարքության տեսանկյունից այս պահին մենք որևէ հնարավորություն չունենք ինչ որ ձևով ավելի իմպերատիվ դրան արձագանքելու»,- հայտնեց հանձնաժողովի նախագահը։

Աղբյուր` Փաստինֆո