Փաստ ինֆո

Հայաստանում ներքաղաքական ճգնաժամ է առաջացել կապիտուլացիայի հետևանքով, բարոյահոգաբանական  մթնոլորտի շատ վատ է, և նման իրավիճակում երկիրը  չի կարող զարգանալ,- «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ հավելելով, որ պետք է  լիվքաթափվի երկրի վատ մթնոլորտը, իսկ դրա միակ ճանապարհը արտահերթ ընտրություններն են:

Մեր զրուցակցի դիտարկմամբ՝ վարչապետը հրաժարվում է արտահերթ ընտրություններից, քանի որ գիտի՝ դրանից հետո ինքն այլևս վարչապետ չի լինելու, իսկ ընդդիմության հաղթանակի դեպքում ինքը կամ պետք է երկրից հեռանա, կամ հնարավոր է ձերբակալվի, հատկապես երբ քննություն իրականացվի` այս  պատերազմի սկսվելու և Շուշիի անկման հետ կապված.
«ԱԳՆ-ն հայտարարեց՝ վարչապետի տեսակետը, թե բանակցային գործընթացում միշտ պահանջել են, որ Շուշին հանձնվի, իրականությանը չի համապատասխանում, այսինքն հրապարակային հերքում են վարչապետի ասածը»,-ասաց Արմեն Բադալյանը:
Քաղտեխնոլոգը մեր խնդրանքով նաև անդրադարձավ նախագահի ուղերձին` կառավարության հրաժարական ու արտահերթ խորհրդարանական ընտրությունների անհրաժեշտության մասին, որն էր դրա քաղաքական նշանակությունը. «Նախագահը մինչ այս զբաղված էր միայն երեխաների հետ պաղպաղակ ուտելով, հանկարծ խիստ ակտիվանում է և նման կտրուկ քաղաքական հայտարարություն անում՝ խորհրդարանական արտահերթ ընտրություններ անցկացնելու: Սա  մտածելու տեղիք է տալիս: Իրեն աջակցող ուժե՞րն են պահանջում նախագահի միջոցով, որ Հայաստանում տեղի ունենան այդ փոփոխությունները, թե՞ այլ գործընթացներ են տեղի ունենում»,-ասաց Արմեն Բադալյանը:

Վերջինիս խոսքով՝ նախագահը  դիվանագետ  և զգուշավոր անձնավորություն է, ուստի ավելորդ տեղը ոչինչ չէր խոսի, քանի որ գիտի՝ արտահերթ ընտրությունների պահանջը կառաջացնի վարչապետի խիստ զայրույթը և ֆեյքային բանակը կարող է ուղղվել իր դեմ. «Նախագահը հիմնվում է քաղաքական այլ ուժերի հանդիպումների արդյունքի վրա , բայց, այնուամենայնիվ, ենթադրում եմ, որ նախագահին աջակցող Հայաստանից դուրս գտնվող ուժերն են պահանջում իշխանության հեռացում՝ նախագահի միջոցով, քանի որ վարչապետը փաստացի գցեց արևմտյան ուժերին, որովհետև այնտեղ  Ռուսաստանի խաղաղապահ զորքերը մտան, և ոչ թե՝ սկանդինավյան, ինչը դուր չի գալիս արևմտյան չերևացող ուժերին»,-մեզ հետ զրույցում նման տեսակետ հայտնեց Արմեն Բադալայանը:

Քաղաքագետը նաև նկատում է , որ աշխարհի բոլոր խորհրարանական երկրներում վարչապետերը հայտարարում են, որ իրենց օրակարգում հրաժարական չկա, բայց որոշ ժամանակ անց հրաժարական են ներկայացնում. «2018թ-ին ապրիլի 21-ին Սերժ Սարգսյանն էլ ասաց, որ իր օրակարգում հրաժարական չկա, բայց հրաժարական տվեց:Կարևոր չէ վարչապետը ինչ է ասել,  կարևոր այն է, արդյո՞ք հասարակությունը կարող է ստիպել նրան տալ  հրաժարական, թե՝չէ»:

Քաղաքագետը պնդում է, որ Հայաստանը այս իշխանության օրոք չի կարող զարգանալ, որովհետև  իշխանությունը չունի պատկերացում երկրի զարգացման վերաբերյալ. «Պռոշյան փողոցում  խորոված անելն ու ուտելն է այս իշխանությունների պատկերացումը երկրի զարգացման վերաբերյալ:Խնդիրը երկրում կայունությունը չի՝ Հյուսիսիային Կորեայում է կայուն, բայց չի զարգանում, նման կայունություն ոչ մեկին պետք չէ»,-ասաց Արմեն Բադալյանը:

Մեր զրուցակիցը նաև վստահեցնում է, որ այսօրվա իշխանություններին ոչ ոք լուրջ չի ընդունում, որովհետև կապիտուլացիայի ենթարկված իշխանություն է:

Արմեն Բադալյանը մեզ հետ զրույցում նշեց նաև, որ «Իմ քայլի» պատգամավորները ընդամենը գլխաքանակ են և նրանց նպատակը միայն պարգևավճար ստանալն է:

«Այն արժեքային համակարգը որոնց դեմ նրանք իբրև պայքարում էին 2018-ի ապրիլ- մայիսին և քննադատում  էին Հանրապետականներին, որ նրանք անխոս ենթարկվում են կառավարությանը և միայն կոճակ սեղմողների գործառույթ են իրականացնում, ցույց տվեցին, որ նրանք էլ ավելի ուժեղ կոճակ սեղմող գլխաքանակ են:Այսինքն նրանք վերադարձան այն արժեքային համակարգին, որի դեմ պայքարում էին»,-եզրափակեց քաղտեխնոլոգը:

Աղբյուր` Փաստինֆո