Փաստ ինֆո

«Ցանկացած համակարգի համար փոփոխությունները կարող են և վնաս, և օգուտ լինել։ Եթե համակարգը երկար ժամանակ լճացած է, ոչ մի բան չի փոխվում, վատ պրոցեսներ են սկսվում»,- այս մասին ֆեյսբուքյան ուղիղ եթերով հայտնեց ռազմական փորձագետ Կարեն Վրթանեսյանը՝ որպես օրինակ բերելով պետական կառավարման համակարգը, որտեղ աթոռներից կառչած շատերը ոչինչ չեն անում։

«Ըստ էության իրենց գործունեությունը աթռից կառչած մնալն է՝ հանկարծ ռիսկի չգնան, հանկարծ նոր բան չփորձեն։ Մյուս ծայրահեղությունն այն է, երբ որ համակարգը պարբերաբար ցնցվում է։ Այդ համակարգը որևէ երկարատև բան չի կարող անել։ Ինչ Նիկոլ Փաշինյանը եկել է իշխանության, ինքը ցնցում է համակարգը»։

Վրթանեսյանը հիշեցրեց, որ Նիկոլ Փաշինյանի ղեկավարության շրջանում երեք գլխավոր շտաբի պետ փոխվեց։ Հաշիվը կորցրել է, թե այսօրվա դրությամբ քանի՞ ԱԱԾ պետ է փոխվել, ՊԲ երեք հրամանատար փոխվեց, ոստիկանությունը փոխվեց։ Իսկ Անվտանգութայն խորհրդի ղեկավարը չփոխվեց ու պաշտոնում ոչ մի բան չարեց։ Ըստ փորձագետի, ռազմական ոլորտում նման փոփոխությունները լավ բանի չեն հանգեցնում, իսկ Նիկոլ Փաշինյանը չունի պետական, ռազմավարական մտածողություն։

Վրթանեսյանն անդրադարձավ Օնիկ Գասպարյանի հայտարարությանը, նշեց, որ ԳՇ պետը պաշտոնին է նշանակվել հունիսի 8-ին, իսկ 12-ին ներկայացրել տարածաշրջանում ռազմաքաղաքական իրադրության վերլուծությունը և զինուժի կարողությունները։

«Այդ մարդը ասել է, որ այլևս մեր հակառակորդը միայն Ադրբեջանը չէ, ալ նաև Թուրքիան։ Այսինքն ունեցել են հետախուզական տվյալներ, որ Թուրքիան Ադրբեջանի հետ պատրաստվում է պատերազմի՝ նշեմ, որ հունիսի 12-ին։ Ինչա՞ անում դրանից հետո Նիկոլ Փաշինյանը՝ ինքը Արտակ Դավթյանին հանում է և օպերատիվ վարչության պետ եղած մարդուն, ուղարկում է ռազմարդյունաբերության ոլորտ։ Նա գիտեր, որ պատերազմի է պատրաստվում Թուրքիան՝ իսկ ինքը Ծառուկյան է բռնում, եսիմ ինչ է անում»։

Ըստ փորձագետի, այդ օրերին մեր հիմնական երաշխիքը թուրքական վտանգից Ռուսաստանն էր, իսկ հունիսի 19-ին ՝ մեկ շաբաթ անց, Նիկոլը հրաժարվում է Մոսկվա գնալ շքերթի՝ պատճառաբանելով համավարակը։

«Չարաճճիություններ են անում։ Այդ բառը լսել եմ նիկոլական շրջանակներից։ Չարաճճիությունների գինը տեսաք քանի՞ կյանքա ու ինչքա՞ն տարածք։ Այդ օրերին՝ կառավարական ՊՈԱԿ-ի փայլուն կադրեր՝ ինձ ու Անժելա Էլիբեգովային քլնգում էին, որ մենք ՀԱՊԿ- ենք պաշտպանում։ Սրանց համար ՀԱՊԿ-ի մասին նորմալ բան ասելը վիրավորանք էր։

Կառավարական ՊՈԱԿ-ը պայքարում էր ՀԱՊԿ-ի դեմ։ Փոխանակ Նիկոլը մեկներ Ռուսաստան, հետ չգար մինչև երաշխիքներ չստանար, նոր զորք չբերեին, Նիկոլը համառորեն շարունակում է հարաբերությունները փչացնել Ռուսաստանի հետ»։

Վրթանեսյանը հարցնում է՝ ի՞նչ են արել պատերազմին պատրաստվելու համար.օգոստոսի կեսին, երբ աշխարհում դպրոցները բացվեցին՝ կորոնավիրուսով վարակակիրների աճ սկսվեց, իսկ Հայաստանում թվերը նվազել էին, և ըստ էության երկրի ղեկավարությունը գիտեր, որ պատերազմ է սկսվելու, բացեցին դպրոցները, իսկ ուսուցիչների թեստավորումը կիսատ թողեցին ու համաճարակը նորից աճեց։

«Մենք եկանք պատերազմի վատ վիճակում, իսկ ընթացքում թիվը բարձրացավ։ Պատերազմի առաջին օրերից ասել եմ, որ հատուկ ուշադրություն է պետք դարձնել, որ կամավորներին իրար գլխի հավաքվում էին, զորակոչ էր՝ մարդիկ փաթաթվում էին, դրանից հետո հուղարկավորությունները։ Հասկանո՞ւմ եք չէ, որ համաճարակի տարածման բարենսպաստ միջավայր էր։ Ոչ մի բան չեն արել այս իշխանությունները դա կասեցնելու համար»։

Աղբյուր` Փաստինֆո