Փաստ ինֆո

Հրաժարականների ինստիտուտը շատ կարևոր ինստիտուտ է ցանկացած բևեռացում լիցքաթափելու համարև պատասխանատվության որոշակի պաշար իրականացնելու համար։ Այս մասին ԱԺ-ում ասաց «Իմ քայլը» խմբակցության պատգամավոր Անդրանիկ Քոչարյանը։

«Պաշտոնյան ինքը պետք է գիտակցի իր հրաժարականի արժեքը և իր կատարած աշխատանքի թերացումները։ Եթե ինքը չի գիտակցում և թողում է, որպեսզի իրեն հանեն, դրանով պրոբլեմ է ստեղծում պետության համար։ Նոր պատերազմ՝ նոր տարածքների դիմաց։ Պաշտպանության նախարարի այս հայտնի թեզից փաստորեն շատ լավ օգտվեց միայն թշնամին։ 44-օրյա պատերազմից հետո, երկար տարիների ընթացքում մեր երկրում ձևավորված անվտանգային համակարգը քայքայվեց։

2016թ.-ի ապրիլյան քառօրյա պատերազմի ժամանակ թշնամին ցույց տվեց, որ չի պատրաստվում խաղաղ ճանապարհով լուծել հարցը, իսկ արդեն պատերազմից հետո փոխանակ իրականության հետ առերեսվելու, ստացած դասերը քաղելու և բանակն ուժեղացնելու, չգիտակցելով պատերազմի քաղաքական հետևանքները այն ժամանակվա զինված ուժերի կոռումպացված ղեկավարությունը պնդում էր, որ մենք հաղթել ենք։

Իսկ արդեն այսօրվա լայնածավալ պատերազմի ընթացքում զինված ուժերի գլխավոր շտաբի կողմից պատերազմը կանխատեսելու, պլանավորելու, ապահովելու ու ղեկավարելու լիարժեք անընդունակությունը, առաջնագծի անպաշտպանվածությունը ՊՆ աննպատակ, չհիմնավորված ու կասկածելի գնումները, ինչպիսիք են պատերազմի ընթացքում չօգտագործված ՍՈՒ-30-ները, ԶՈՒ նոր կառուցվածքը և հատուկ տեխնիկայի գիտակցաբար և նպատակային արժեզրկումն ու ոչնչացումը, զորահավաքի տապալումը, կազմակերպական կարողությունների լիարժեք բացակայությունը և շատ այլ հանգամանքներ բերեցին այս իրավիճակին»,-նշեց Անդրանիկ Քոչարյանը՝ հավելելով, որ այդ մասին կխոսվի հետագայում։

Անդրանիկ Քոչարյանն ընդգծեց, որ երբ ասում է Գլխավոր շտաբի այսօրվա թերացումները, դա չի վերաբերում Գլխավոր շտաբի ներկայիս պետ Օնիկ Գասպարյանի կառավարման ժամանակահատվածին։ Սա վերաբերում է Ապրիլյան պատերազմից հետո այն ժամանակվա թե՛ օպերատիվ վարչության պետի, հետագայում նաև գլխավոր շտաբի պետի պարտականությունները կատարող Արտակ Դավթյանին. «Օնիկ Գասպարյանն արել է մաքսիմալը որպես բանակի ակունքներից դեպի ամենաբարձր զինվորական պաշտոնն անցած զինվորական»,-նշեց Անդրանիկ Քոչարյանը։

Նա նկատեց՝ կատարվածից հետո առնվազն սպասելի էր, որ ՊՆ նախարարը և զինված ուժերի այն պատասխանատուները, որոնք աններելի բացթողումներ են ունեցել, պետք է արդեն հրաժարական տված լինեին. «Նրանց կողմից անմիջապես հրաժարական չտալը խոսում է այն մասին, որ նրանք բացարձակապես չեն գիտակցում՝ ինչ են արել և ուր է տանելու մեզ այս ձախողումը։ Այս անձանց անպտիժ մնալու դեպքում բանակում ոչ միայն շարունակվելու են նման երևույթները, այլև լրջագույն սպառնալիք են դառնալու ՀՀ անվտանգության համար»,-ասաց Անդրանիկ Քոչարյանը։

Աղբյուր` Փաստինֆո