Փաստ ինֆո

Մարմնի հաշմանդամությունը լուծելի հարց է, բայց հոգու հաշմանդամությունն անլուծելի հարց է։ Այս մասին ԱԺ-ում ասաց «Լուսավոր Հայաստան» խմբակցության պատգամավոր Տարոն Սիմոնյանը։

«2.5 տարի այս ամբիոնից ամեն անգամ հայտարարում եմ՝ զգույշ խոսեք Հայաստանում, զգույշ քայլեք Հայաստանում։ Ձեր ամեն մի խոսքը, ամեն մի քայլն արձագանքում է ու շատ ավելի մեծ հետևանքներ է առաջացնում։ Գանգոսկրի մեջ մի օրգան կա, որ եթե լավ օգտագործվի, մենք ամեն օր այս խնդիրների առջև չենք կանգնի։ Ես չգիտեմ որերորդ անգամ եմ բարձրաձայնում այս հարցը, բայց եղած հնարավորությունները դուք չօգտագործելով՝ չգիտեմ ում եք սպասում, որտեղից եք օգնության սպասում, եթե ձեր ձեռքերում առկա գործիքները չեք օգտագործում։ Երկու ամիս է գոռում ենք, որ միջազգային ատյաններում հարցերը բարձրացնելու հնարավորություններ կան։ Գրում տալիս ենք ձեռքներդ, ոչ մի բան չեք անում։ Ու՞մ մեղադրենք։

Ասում եք՝ հայտարարություն եք ստորագրել՝ անելանելի վիճակից ելնելով, միգուցե, բայց արդյոք գիտեք, որ այդ հայտարարությունն ինքնին երեք հիմքով առ ոչինչ է։ Այն խախտում է Վիեննայի կոնվենցիայի 51-րդ հոդվածը՝ սպառնալիքի ներքո կնքված պայմանագիրն առ ոչինչ է։ Ներպետական օրենսդրությամբ միջազգային պայմանագիրը վավերացման գործընթաց ունի։ Փաստացի դա շոշափում է այն հարցերը, որոնք միջազգային պայմանագրի կարգավորման տակ են։ Որևէ մեկդ հասկանու՞մ է, թե այդ հայտարարության տակ ստորագրելով՝ Հայաստանի ղեկավարն ինչ բեռ է բերել Հայաստանի վրա և ինչ իրավական հետևանքներ դա պետք է առաջացնի ՀՀ-ի համար, այդ թվում ֆինանսատնտեսական»,-նշեց Տարոն Սիմոնյանը։

Պատգամավորն ընդգծեց՝ այս հայտարարությամբ խախտվել է էթնիկ զտումների արգելքը և դրա տակ ՀՀ ղեկավարի ստորագրությունն է. «Սրանից հետո դուք ի՞նչ հարց եք քննարկում։ Արդյոք հասկանում եք, որ այն մարդը, որն այս փաստաթղթի տակ ստորագրել է, ի վիճակի՞ է լինելու շարունակել ինչ-որ բանակցություն, որը բխում է այս հայտարարությունից։ Ոչ ոք ձեզնից իշխանություն չի խլում, կա խնդիր և այն պետք է լուծենք համազգային ջանքերի շնորհիվ։ Իշխանությունը ձեզ պահեք, ձեզ լինի, բայց համազգային հարցերի լուծման համար ճիշտ մարդիկ և ճիշտ կարծիքներ են պետք»,-հավելեց Տարոն Սիմոնյանը։

Աղբյուր` Փաստինֆո