Փաստ ինֆո

«Հարգարժան պարոն Դանիելյան, ինչպե՞ս է ձեր աղջիկ Շուշին, հուսամ լավ է։ Մենք ձեր աղջկա ձեռքը բռնած մի օր անպայման գնալու ենք Շուշի, այն Շուշին, որը հանձնեց ձեր գերագույն գլխավոր հրամանատարը»,- ԱԺ նիստի ժամանակ, դիմելով իմքայլական պատգամավոր Համազասպ Դանիելյանին, ասաց «Բարգավաճ Հայաստան» խմբակցության պատգամավոր Նաիրա Զոհրաբյանը:

Պատգամավորը հիշեցրեց, որ գերագույն գլխավոր հրամանատարը հայտարարել էր, թե պատերազմը կանգնեցնելու ցանկացած սցենարի դեպքում Շուշին պիտի հանձնվեր առանց մարտերի։ Հիշեցրեց այն սարսափելի կադրերը, որոնք բոլորը տեսել են, թե ինչպես են Քարինտակի գյուղից դուրս հանում մեր զինվորների աճյունները։

Զոհրաբյանը նշեց, որ խորհրդարանի դահլիճում կարող է և պետք է քննարկվի միայն մեկ հարց՝ ռազմական դրության չեղարկում, Նիկոլ Փաշինյանի հրաժարական։

«Ես երկար տարիներ աշխատել եմ հայկական ժամանակում, արել եմ հարցազրույցներ սերիալ մարդասպանների հետ։ Նրանցից մեկը իմ հետ հարցազրույցում ասաց՝ «Ես աղերսում էի, որ ինչ որ պահի, ինչ որ մեկը իմ ձեռքը բռնի»։ Հիմա մենք պատմական առաքելութուն ունենք այս խայտառակ կապիտուլյացիոն համաձայնագրի ստորագրումից հետո. բռնել Նիկոլ Փաշինյանի ձեռքը, քանի դեռ նա չի հասցրել նոր ավերածություններ անել»։

Զոհրաբյանի խոսքով` պետք է փորձենք փրկել այն, ինչ հնարավոր է փրկել Արցախից, ինչպես նաև` Մեղրին և Հայաստանի` վտանգի տակ գտնվող մյուս բնակավայրերը:
«Մենք, մեր ռազմավարական գործընկեր Ռուսաստանի հետ քննարկենք, փորձենք փրկել պայմանագրի տակ տեղադրված այն ականները, որոնք վերաբերում են Հայստանի անվտանգությանը, Մեղրիին և Հայստանի տարածքներին։ Փորձենք փրկել այն, ինչ հնարավոր է փրկել Արցախից, ինչի ռումբերը տեղադրված են այս ակյանների տակ։

Դուք բոլորդ շատ լավ հասկանում եք, որ սա ցեղասպանությունից հետո Հայաստանի թիկունքին հասցված ամենադաժան հարվածն էր։ Պատմության մեջ չի եկել և Նիկոլ Փաշինյանը չի լինելու այն բացառությունը, որ կապիտուլյացիայով Հայաստանը թուրքի առաջ ծնկի բերած ղեկավար մնա»,- ԱԺ ամբիոնից հայտարարեց Նաիրա Զոհրաբյանը։

Աղբյուր` Փաստինֆո