Փաստ ինֆո

«Հայրենիք» կուսակցության նախագահ Արթուր Վանեցյանի նկատմամբ կալանավորումը որպես խափանման միջոց ընտրելու մասին միջնորդությունը մերժելու Երևանի ընդհանուր իրավասության դատարանի որոշման դեմ վերաքննիչ բողոք կներկայացվի։  Այս մասին «Փաստինֆո»-ին ասաց ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը` նշելով, թե դատարանի որոշումը սկզբունքորեն հակասում է գործի նյութերով հիմնավորված փաստարկներին և Դատախազության դիրքորոշմանը, հետևաբար՝ վերաքննիչ բողոք կնախապատրաստվի:

Ինչ վերաբերում է վարույթն իրականացնող մարմնի կողմից հրապարակված ձայնագրությունը մոնտաժված լինելու մասին դատական նիստում հնչած  հայտարարությանը, ապա դատախազությունից պարզաբանեցին. «Պաշտպանը դատական նիստում համեմատել է գաղտնալսված հեռախոսային խոսակցությունների զննության արձանագրությունը և այդ խոսակցության՝ ԱԱԾ հաղորդագրության մեջ առկա հատվածը և նշել, որ դատարանին ներկայացված զննության արձանագրությունը պարունակում է ավելի շատ տվյալներ, որոնք խոսակցության ձայնագրության մեջ չկան, հետևաբար՝ կեղծ է։

Դատախազը պարզաբանել է, որ դատարանին  ներկայացված զննության արձանագրությունը արտահայտում է խոսակցության ամբողջական բովանդակությունը, իսկ հաղորդագրության մեջ առկա  ձայնագրությունն ամբողջական չէ, քանի որ վարույթն իրականացնող մարմինը նախաքննության շահերից ելնելով, հնարավոր է համարել հրապարակել խոսակցության մի մասը»,- պարզաբանեցին դատախազությունից՝ նշելով, որ մատնանշված մոնտաժի արդյունքում ոչ թե խեղաթյուրվել է խոսակցության բովանդակությունը կամ առավել ևս ավելացվել հատվածներ,այլ դրանում առկա և դատարանին ներկայացված առանձին տվյալներ տեսանյութում չեն հրապարակվել։

Ավելի վաղ հայտնել ենք, որ Արթուր Վանեցյանը ձերբակալվել էր ՀՀ քրեական օրենսգրքի 35-300-րդ հոդվածի 1-ին մասի՝ իշխանության յուրացման և 35-305-րդ հոդվածի՝ պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման և 235-րդ հոդվածի՝ ապօրինի զենք զինամթերք պահելու կասկածանքով։ Ձերբակալման որոշման դեմ  պաշտպանները բողոք են  ներկայացրել, որը նոյեմբերի 15-ին Երևանի ընդհանուր իրավասության դատարանը բավարարել էր այն՝ ոչ իրավաչափ համարելով ձերբակալությունը։ Նույն օրը վարույթն իրականացնող մարմինը մեղադրանք է առաջադրվել Վանեցյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան։ Երևանի ընդհանուր իրավասության դատարանը՝ նախագահությամբ դատավոր Մարինե Մելքոնյանի նախագահությամբ,  մերժել է «Հայրենիք» կուսակցության նախագահ Արթուր Վանեցյանի նկատմամբ  կալանավորումը որպես խափանման միջոց ընտրելու մասին քննիչի միջնորդությունը` հիմնավոր կասկածի բացակայության հիմքով:
 
Միայն պետության ներսում քաղաքական հակառակորդներին լռեցնելու ուղղությամբ «ստեղծագործելու» ունակ իշխանության մտքի թռիչքը հասել է արդեն իշխանության յուրացման ու Նիկոլ Փաշինյանի սպանության նախապատրաստման մեղադրանք «ծննդաբերելուն»։

Այս ամենն արդեն իրավական ոլորտում որևէ կերպ մեկնաբանելն անհնար է։ Սա խայտառակ քաղաքական հետապնդում է, ուղղված իշխանական աթոռներին ամեն կերպ կառչելուն, հակապետական ծրագրերն ու հայրենիքը թշնամուն հանձնելը ավարտին հասցնելուն», - հայտարարել էին փաստաբանները:

Հեղինակ՝ Իզաբել Սահակյան

Աղբյուր` Փաստինֆո