Փաստ ինֆո

Ֆորմալ առումով իշխող ուժ համարվող քաղաքացիական պայմանագիրը՝ վերից վար, իմքայլական պատգամավորները և թավշյա կառավարությունը Փաշինյանի կողմից գաղտնիության պայմաններում ստորագրած կապիտուլյացիոն համաձայնագրից հետո Հայաստանում և Արցախում այլևս հանրության համար դադարել են դիտարկվել որպես իշխանություն։

Այսօր, ըստ էության, կառավարությունում գործող, գործ անող միակ կառույցը ՀՀ պաշտպանության նախարարությունն է՝ իր տարբեր ստորաբաժանումներով հանդերձ, ինչ-որ չափով նաև՝ մյուս ուժայինները, մնացյալը դեռ պատերազմական օրերից սկսած՝ անգործության էին մատնված։ Կարևոր խնդիրը, որ օդում կախված է, նոյեմբերի 10-ից՝ վարչապետ Նիկոլ Փաշինյանի հրաժարականն է։ Ընդ որում, այս խնդիրը չի ձևակերպվել ինչ-որ կաբինետներում, քաղաքական ուժերի կողմից, թեպետ և՛ քաղաքական ուժերը, և՛ առաջին հերթին հանրությունն այսօր սպասում են Փաշինյանի անցնցում հրաժարականին։

Իրականում նրա և իր կուսակիցների քայլերը բրոունյան անկանոն շարժում են հիշեցնում, թեպետ իմքայլական պատգամավորների կարևոր քայլը մեկը պիտի լիներ՝ միանալ իրենց գործընկերներին և պահանջել Փաշինյանի հրաժարականը։ Բայց պարզվում է՝ 2.5 տարին թավշյա, փողոցից իշխանության եկածների համար բավական եղավ, որ սոսնձվեն ու պոկ չգան իրենց աթոռներից:

Թիմային, այս պարագայում՝ թայֆայական մտածողությամբ և անհեռատեսությամբ առաջնորդվողներն ամեն օր հեռացնում են մեզ մեր ազգային, պետական, անվտանգային, դիվանագիտական կարևորագույն խնդիրների լուծումներից։ Սնամեջ են և ծիծաղելի իմքայլականների այն մտայնությունները, թե՝ իրենց գործընկեր խորհրդարանական ուժերի և հրապարակում Փաշինյանի հրաժարականը պահանջողների միտք բանին իշխանության հասնելն է։ Արդեն իսկ «Սյունյաց երկիր» մարզային թերթը դիմելով մարզի չորս պատգամավորներին՝ կոչ է արել հանուն հայրենիքի, հանուն Սյունիքի՝ հրաժարվել «Իմ քայլը» դաշինքից և պահանջել Փաշինյանի հրաժարականը:

Ժամանակն այլ է, պետության առջև ծառացած խնդիրներն ու գերխնդիրներն՝ այլ։

Այսօր մեր ժողովուրդը չպետք է ունենա այն շռայլությունը, որ իր հարկերի հաշվին վճարի ոմն մեկին, որ կարող է ասել հպարտորեն՝ պարոն Փաշինյան, եթե դուք անգամ դատարկ թուղթ ներկայացնեք Ազգային Ժողով, ես պատրաստ եմ ստորագրել։ Ինչ երաշխիք, որ այս կերպ առաջնորդվողները չէ, որ դնում են իրենց պատասխանատու ստորագրությունը՝ պետության և ազգի համար կարևոր փաստաթղթերի տակ։ Այսօրինակ՝ դատարկ թղթի կամ բանավոր խոսքի տակ ստորագրություն դնող քաղաքական ուժը առաջիկա բանակցություններում անելիք չունի:

Տարօրինակ չէ՞, որ իմքայլականները կորցրած դուխի, թանկարժեք ժամացույց, համակարգիչ, բռնակներ և այս կարգի՝ խուլիգանության հետևանք՝ բաների մասին բարձրաձայնում են, երբ ընդդիմադիր պատգամավորները մեր անհուն, անչափելի կորուստների մասին են փաստում՝ որպես օրակարգի հիմնական հարց ձևակերպելով վարչապետի հրաժարականը։ Բայց առաջնահերթությունները այլ են և կարևոր խնդիրը թողած՝ գործ անելու իմիտացիա են ստեղծում՝ իմքայլականները՝ շարունակելով բյուջեի և պարգևավճարների համար կռիվ տվողի կեցվածքով իրենց անիմաստ ճամարտակությունները։ Թե բա՝ մենք պատրաստ ենք մեզ վրա վերցնել անցյալ 30 տարիներ սխալները։ Յա, իրո՞ք, ձեր 2․5 տարվա սխալները արդեն ծով են, բա՛վ է, հեռացե՛ք․․․

5000 երիտասարդ կյանքեր կորցրած, և կրկնակի անգամ շատ վիրավոր, հաշմված զինվոր ու կամավոր ունեցող, հայրենիք կորցրած, հայոց երբեմնի մշակութային մայրաքաղաք Շուշին կորցրած հայությունը, այսօր, ըստ էության, նաև Հայաստանով ու Արցախով հանդերձ՝ թշնամու օղակի մեջ է հայտնվել՝ առանց անվտանգության գոտիների և համակարգերի․․․

2018 թվականի ապրիլին մեր ժողովրդի՝ ոչ թե գիտակցված ու հիմնավորված ընտրությամբ, այլև՝ բացառապես նախկինների հանդեպ մերժողական վերաբերմունքով պայմանավորված ուժը ճակատագրական եղավ մեզ համար։

Ընտրությունը միշտ հանուն պիտի լինի։

Հեղինակ՝ Ա․Ե

Աղբյուր` Փաստինֆո