Փաստ ինֆո

Չեմ կարծում՝ ճիշտ ռեժիմ է, որ ասենք բնակչությունը տվյալներ ունի, որ հակառակորդին կոորդինատներ են վաճառել։ ԱԺ-ում այս մասին ասաց ՀՀ վարչապետ Նիկոլ Փաշինյանը, ում կարծիքով նման կոնկրետ դեպքերով պետք է քրեական գործեր հարուցվեն։

«Մեղավորներ պետք է փնտրվեն, եթե նման դեպքեր կան, բայց ուղղակի խոսել տեսական դավաճանների մասին, որոնք  տեսական տվյալներ են հայտնել հակառակորդին, չեմ կարծում՝ ճիշտ ռեժիմ է։ Այն քաղաքացիները, որոնք տվյալներ ունեն, անպայման պետք է դիմեն իրավապահ մարմիններին»,-ասաց Նիկոլ Փաշինյանը։

Անդրադառնալով իշխանության սխալներին՝ վարչապետը նշեց, որ վերջին 2.5 տարվա իրենց սխալն այն է, որ չեն կարողացել լրացնել այն ամենը, ինչ անհրաժեշտ էր լրացնել. «Օրինակ հակաօդային պաշտպանության համակարգում մենք հսկայական ձեռքբերումներ ենք ունեցել, ինչի մասին հրապարակային հայտարարել ենք։ Մենք ձեռք ենք բերել մոդեռնիզացված ԱՍԱ-ԱԿԱ համակարգեր և այդպես շարունակ։

Այլ բան, որ իրադարձությունների զարգացումն ի վերջո ի ցույց է դրել, որ այդ բոլոր միջոցները բավարար չեն գտնվել արդի մարտահրավերները սպասարկելու համար մի պարզ պատճառով, որ վերջին ամիսների ընթացքում ի հայտ են եկել այլ գործոններ, որոնք որոշակիորեն փոխել են ուժերի հարաբերակցությունն այդ ոլորտում։ Ընդհանուր առմամբ եթե խոսենք Հայաստանի ռազմավարական սխալի մասին, կարող եմ ասել, որ մեր ամենամեծ սխալը եղել է այն, որ մենք մտածել ենք՝ երկու մոտեցումը կարող է մեկտեղվել. Մոտեցումներից մեկը՝ պատերազմի բացառումը և երկրորդը՝ ոչ մի թիզ հող։

Մենք պետք է հասկանայինք, որ պետք է ունենանք սցենար և պատրաստվենք այդ սցենարին։ Մեր ամենամեծ սխալը եղել է այն, որ մեզ թվացել է՝ մենք անվերջ կարող ենք ժամանակը ձգել։ Եկեք այդ փաստը հստակ արձանագրենք. 1998թ.-ից ի վեր տեղի ունեցած բանակցային գործընթացում որոշակի շոշափելի եղել է միայն մեկ ձևակերպում և գործոն, որ բանակցային գործընթացի նպատակը 7 շրջանների վերադարձն է Ադրբեջանին։

Բանակցային գործընթացում միակ կոնկրետությունը սա է եղել։ Մեր մեծագույն ռազմավարական սխալն այն է եղել, որ մենք երկու սցենարներից ընտրություն չենք կատարել, այդ երկուսն ուզեցել ենք համատեղել։ Մենք պետք է ընտրեինք՝ կա՛մ այն ենք ընտրում, կա՛մ մյուսը։ Մենք փորձել ենք այդ ընտրությունը կատարել, ճիշտն ասած կատարել ենք, այլ բան, որ 2.5 տարվա ընթացքում չենք կարողացել անել այն և այնքան, որ այդ ընտրությունը երաշխավորվեր»,-ասաց վարչապետը։

Աղբյուր` Փաստինֆո