Փաստ ինֆո

Ակնհայտ է, որ Նիկոլ Փաշինյանի քմահաճույքի, աթոռի ու անվտանգության համար պետական համակարգը դադարել է լինել պետական համակարգ ու դարձել է Նիկոլական համակարգ: Այս մասին քիչ առաջ լրագրողների հետ զրույցում ասաց «Ադեկվադ» միաբանության անդամ Կոնստանտին Տեր-Նակալյանընդգծելով, որ չկա ոչ մի իրավաչափություն, օրինականություն:

«Այսօր այստեղ Աշոտ Մինասյանի ու Արթուր Դանիելյանի խափանման միջոցը կամ ճակատագիրը չի որոշվում: Այսօր այստեղ գյոռբագյոռ են անում մեր արժանապատվությունը: Երկիրը աղետի հասցրած քաղաքական իշխանությունը ոչ միայն չի հեռանում, այլ կապիտուլյացիա ստորագրողները փորձում են դատել այն մարդկանց, ովքեր իրենց կյանքն են դրել զոհասեղանին, որ այդ կապիտուլյացիան չլիներ ու չէր լինի, եթե մեզ մեջքից չխփեին»,-ասաց Կոնստանտին Տեր-Նակալյանը:

Վերջինս նկատեց՝ իրեն սպառնում են, որ իր ընկերները, ինքը կարող են հայտնվել բանտում կամ զրկվել կյանքից. «Ավելի լավ է հայտնվեմ բանտում ու զրկվեմ կյանքից, քան այս տականքների հետ շնչեմ նույն օդը: Ինչ պետք է անեն այստեղ, որ լինի ավելի սարսափելի, քան այն, ինչ տեսել ենք առաջնագծում: Առաջնագիծը երևի ամենաքիչ սարսափելին էր, ամենասարսափելին այն է, ինչ տեսնում ենք թիկունքում»,-նշեց Կոնստանտին Տեր-Նակալյանը:

Անդրադառնալով ԱԱԾ-ի տարածած տեսանյութին, Կոնստանտին Տեր-Նակալյանը նշեց, որ իր կարծիքով դա շինծու, սպիտակ թելերով կարած, էժանագին բեմադրություն է. «Ուրեմն մարդիկ, ովքեր պլանավորում են պետական հեղաշրջում ու Նիկոլ Փաշինյանի լիկվիդացիա, էնքան հիմար են, որ բռնելու են հեռախոսով մանրամասները քննարկեն: Ինչ-որ մեկը դրան հավատում է: Հիմա մտեք ցանկացած բակ, ցանկացած շենք և կլսեք այդ խոսակցությունը հազարավոր մարդկանց կողմից, թե ինչ են նրանք կարծում այս դավաճանների մասին ու ինչ ճակատագիր են ուզում այս դավաճանների համար: Քանի տասնյակ մարդ են պատրաստ նրանք ձերբակալել: Հասարակության գլխի տակ փափուկ բարձ են դնում, թե հես Քարվաճառը պահում են, հետ են բերելու: Այդ պատրվակով իրական կռվածներին չեն իջեցնում այնտեղից, որովհետև այդ մարդիկ էլ, որ գան տեսել են կատարվածը, հստակ գիտի հասցեատերերին: Ստեղծված իրավիճակի համար ամենքը կրում է իր բաժին պատասխանատվությունը, այդ թվում նախկին իշխանությունները, բայց կապիտուլյացիայի թուղթ ստորագրել է Նիկոլ Փաշինյանը»,-հավելեց Կոնստանտին Տեր-Նակալյանը:

Աղբյուր` Փաստինֆո