Փաստ ինֆո

«Ադկեվադ» միաբանության ղեկավար Արթուր Դանիելյանին ձերբակալելու մասին որոշման դեմ բողոք է ներկայացվել, որը մակագրվել է Երևանի ընդհանուր իրավասության դատարանի դատավոր Արտուշ Գաբրիելյանին: Այս մասին «Փաստինֆո»-ին ասաց փաստաբան Տիգրան Աթանեսյանը։

Ավելի վաղ հայտնել ենք, որ «Ադեկվադ» կուսակցության ղեկավար Արթուր Դանիելյանը, մարտական դիրքերից վերադառնալուց հետո, ձերբակալվել է նոյեմբերի է 14-ի ուշ երեկոյան` Երեւանում: Նրան վերագրվող կասկածանքը` ՀՀ քրեական օրենսգրքի 226.2-րդ հոդվածը վերաբերում է բռնություն գործադրելու հրապարակային կոչերին, բռնությունը հրապարակայնորեն արդարացնելուն կամ քարոզելուն` այդ թվում ռասայով, մաշկի գույնով, էթնիկական հատկանիշներով, ազգային փոքրամասնությանը պատկանելությամբ պայմանավորված:

Պաշտպան Տիգրան Աթանեսյանը «Փաստինֆո»-ի հետ զրույցում ասաց, որ ձերբակալումը հիմարություն է, նման արարք չկա, պարզապես քաղաքական հետապնդում է։
Ինչ վերաբերում է ենթադրյալ արարքին, Աթանեսյանը նշեց, որ խոսքը գնում է ինչ- որ տեսանյութի մասին, մասնավորապես, իբրև թե ինչ-որ տեսաելույթի ժամանակ ինչ-որ սպառնալիքներ են հնչել, բայց նման բան իրականում չկա։ Փաստաբանի դիտարկմամբ՝ գործ ունենք ստալինյան սկզբունքի հետ, այնքան որ անձին ձերբակալեն, վախեցնեն։

Բացի դա՝ Արթուր Դանիելյանը ցուցմունք չի տվել, փաստաբանի խոսքով՝ չկա կասկածանք, ինչի շուրջ Արթուր Դանիելյանը պետք է ցուցմունք տար։

«Կասկածանքը դատարկ է, զրո է։ Ինչ ցուցմունք տա, ինչ բացատրի, նման բան չի եղել»,- նշեց Աթանեսյանը ՝ հավելելով, որ որևէ իրավական և փաստական տվյալներ ներկայացված չեն։

Հիշեցնենք՝ շուրջ 45 օր տևած կատաղի ռազմական գործողությունների արդյունքում Նիկոլ Փաշինյանն առանց խորհրդակցելու ՀՀ նախագահի, քաղաքական ուժերի, խորհրդարանի հետ ստորագրեց զինադադարի այսպես կոչված հայտարարությունը, համաձայն որի, Արցախում տեղակայվում են ռուսական խաղաղապահ ուժեր, փոխարենը՝ հայ զինծառայողները դուրս են բերվել, Ադրբեջանին է հանձնվել Ֆիզուլիի շրջանը, Ջաբրայիլի շրջանը, Կուբաթլույի, Զանգելանի, Հադրութի շրջանը հիմնականում, Մարտունիի շրջանից ինչ-որ մաս, Ասկերանի շրջանից, հայկական կողմին այլևս չի պատկանում նաև բերդաքաղաք Շուշին։ Ջիջվել է նաև Բերձորը, իսկ Արցախի և Հայաստանի միջև կապ կհաստատվի 5 կմ լայնություն ունեցող ճանապարհով, որը կհսկվի ռուս խաղաղապահների կողմից։ Արցախն Ադրբեջանին հանձնելու որոշման դեմ և Նիկոլ Փաշինյանի հրաժարականի պահանջով ցույցեր են իրականացվել, ինչին զուգահեռ Նիկոլ Փաշինյանի իշխանությունը ռեպրեսիաների միջոցով փորձել է ճնշել քաղաքական ընդդիմադիրներին։ Ավելին՝ նույնիսկ քրեական գործ է հարուցվել իշխանության յուրացման նախապատրաստելու և Նիկոլ Փաշինյանի սպանությունը նախապատրատելու հատկանիշներով, որի շրջանակներում ձերբակալվել են Արթուր Վանեցյանը, Վահրամ Բաղդասարյանը, դաշնակցական ազատամարտիկ Աշոտ Ավագյանը, լեգենդար հրամանատար Աշոտ Մինասյանը։

Հեղինակ՝ Իզաբել Սահակյան

Աղբյուր` Փաստինֆո