Փաստ ինֆո

Արթուր Վանեցյանը ձերբակալվել է ապօրինի, բողոք ենք ներկայացրել դատարան, որտեղ վիճարկում ենք ձերբակալության իրավաչափությունը, սակայն նախաքննական մարմինը, քաջ գիտակցելով, որ ձերբակալումն ակնհայտ ապօրինի է, այսօր մեղադրանք է առաջադրել Արթուր Վանեցյանին՝ իշխանության յուրացման և Նիկոլ Փաշինյանի ենթադրյալ սպանության նախապատրաստության համար։ Այս մասին լրագրողների հետ զրույցում ասաց փաստաբան Լուսինե Սահակյանը։

Նրա խոսքով՝ մեղադրանքն ակնհայտ ապօրինի է, մեղադրանքի բովանդակությունն՝ անհասկանալի, մեղադրանքի էությունը չի էլ պարզաբանվել, Արթուր Վանեցյանն առաջադրված մեղադրանքը չի ընդունում։ Պաշտպանը հայտնեց, որ պահանջել են առերեսում կատարել բոլոր այն անձանց հետ, որոնք հնարավոր է, որ վկայած լինեն իր դեմ և բացահայտել այն ապացույցները, որոնք հիմք են տվել այս մեղադրանքն առջադրելու համար, քանի որ չեն պատկերացնում, թե ինչի մասին է խոսքը գնում, որ կարողանան պատշաճ փաստարկներ ներկայացնել։ Ընդ որում՝ նկատի ունենալով նաև ԱԱԾ հրապարակած ձայնագրությունը, պաշտպանական կողմը պահանջել է, որ բացահայտվի, թե ովքեր են խոսացող անձինք, որովհետև խոսակցությունից պարզ չէ և այդ անձանց հետ կազմակերպեն առերեսում, որ պարզ լինի, թե ինչի մասին են նա ընդհանրապես խոսում և պաշտպանական կողմը հարցեր ուղղեն։

Լուսինե Սահակյանը հայտնեց, որ մինչ այս պահը որևէ առերեսումներ չեն կատարվել, որևէ ապացույց նույնիսկ ձևական չի ներկայացվել, ձայնագրությունների մասին տեղեկացվել են մամուլից և անհասկանալի է, թե ինչի մասին է խոսակցությունը։ Լուսինե Սահակյանը նկատեց՝ մեղադրանքը քաղաքական հետապնդում է և ամեն ինչ արվում է, որ փորձեն կասեցնել ժողովրդի ցասումը և անձինք, որոնք հնարավոր է ինչ-որ գործողություններ ձեռնարկեն, որ ժողովրդին կարողանան տանել այն ուղղությամբ ժողովրդին, որ չկորցնենք մեր հայրենիքը, ամեն ինչ անում են, որ իրենց ծրագիրը մինչև վերջ հասցնեն։ Փաստաբանը նշեց, որ իրենց համար նույնիսկ կասկածանքը և մեղադրանքը կապ չունի և այս օրերը ևս ցույց տվեցին, որ իրենց համար որևէ նշանակություն չունի։

Սահակյանը նշեց, որ դեռևս իրենց չի ներկայացվել՝ Արթուր Վանեցյանի նկատմամբ կալանավորումը որպես խափանման միջոց ընտրելու մասին, սակայն նման շուտափույթ մեղադրանք առաջադրելը նշանակում է, որ չի բացառվում, որ նման միջնորդություն կներկայացվի։

Աղբյուր` Փաստինֆո