Փաստ ինֆո

Երևանի ընդհանուր իրավասության դատարանի Շենգավիթ նստավայրում մեկնարկեց լեգենդար  հրամանատար Աշոտ Մինասյանի՝ Աշոտ Երկաթի ձերբակալելու որոշման դեմ փաստաբանների բողոքի քննարկումը:

Աշոտ Մինասյանի պաշտպան Արամ Վարդևանյանը լրագրողների հետ զրույցում ասաց՝ դատական գործընթացից շատ բան պարզ կլինի. «Ես պետք է 11:30 այստեղ լինեի, բայց 12-ին 5 պակաս եկա, որովհետև ԱԱԾ-ում էի գտնվում, և Աշոտ Մինասյանին մեղադրանք էին առաջադրում:

Ամեն կերպ փորձում էին, որ ես հնարավորություն չունենայի այս նիստին ներկա գտնվել ու նիստը հետաձգվեր: Ես ուղղակի վեր եմ կացել ու գնացել ԱԱԾ-ի քննչական դեպարտամենտից, որովհետև դա հնարքներից մեկն է՝ փորձել ամեն ինչ անել, որ ձերբակալման հետ զուգահեռ քննվի կալանավորման հարցը: Այդպես էր եղել Արսեն Բաբայանի և բազմաթիվ այլ գործերով: Ինձ համար դա բավականին տհաճ էր: Երբ ինձ հետ կապ հաստատեցին ԱԱԾ-ից, խնդրեցին ներկայանալ, ես հարց տվեցի՝ արդյոք սա վերաբերվում է մեղադրանք առաջադրելուն, կալանավորման միջնորությանը և ինձ բառացի ասացին ոչ: Գնում, ներկայանում ես և այսպիսի գործողություններ են կատարվում: Երբ քննչական մարմինը ստիպված է լինում նման հնարքների դիմել, դա միայն խոսում է քաղաքական գործընթացների մասին»,-նշեց Արամ Վարդևանյանը:

Վերջինս վստահ է, որ լինելու է կալանավորման միջնորդություն: Փաստաբանը նկատեց՝ հիմա շատ ավելի լուրջ հարցեր ունենք և վստահաբար չպետք է նման գործերով ծանրաբեռնվենք:

Ավելի վաղ հայտնել ենք, որ Աշոտ Մինասյանը՝ Աշոտ Երկաթը ձերբակալվել է ՀՀ քրեական օրենսգրքի 35-300-րդ հոդվածի 1-ին մասի՝ իշխանության յուրացման և 35-305-րդ հոդվածի՝ պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման և 235-րդ հոդվածի՝ ապօրինի զենք զինամթերք պահելու կասկածանքով։ Այլ կերպ ասած՝ 40 օր առաջնագծում գտնվող, երեք պատերազմների մասնակից ազատամարտիկը կասկածվում է Նիկոլ Փաշինյանի սպանության նախապատրաստման մեջ։ Մինասյանն ինքը կասկածանքի շուրջ ցուցմունք չի տվել, միայն հայտարարությամբ է հանդես եկել՝ նշելով, որ իրականացվում է քաղաքական հետապնդում։

Նշենք, որ նույն քրեական գործի շրջանակներում ձերբակալվել են նաև Արթուր Վանեցյանը, Վահրամ Բաղդասարյանը, դաշնակցական ազատամարտիկ Աշոտ Ավագյանը:

Աղբյուր` Փաստինֆո