Փաստ ինֆո

«Թե քանի զինծառայողի դի է երեկ դուրս բերվել, մենք որևէ տեղեկություն չենք հրապարակելու»,- «Փաստինֆո»-ի հետ զրույցում ասաց Կարմիր Խաչի հայաստանյան գրասենյակի մամուլի պատասխանատու Զառա Ամատունին՝ նշելով, որ տվյալները պետք է տրամադրեն ՊՆ-ից։ 

Զառա Ամատունին հաստատեց՝ ընդգրկված ենք որպես չեզոք միջնորդ։

«Երեկ ներկա ենք եղել դիերի փոխանակման գործողությանը և շարունակում ենք կազմակերպչական հարցերով քննարկումներ անել` թե կողմերի, թե ռուս խաղաղաղապահների ներկայացուցիչների հետ, որոնք համակարգում են նաև այս գործընթացը»։

Անդրադառնալով հարցին, թե հիմնականում որտե՞ղ է տեղի ունենում դիերի փոխանակման գործընթացը՝ Ամատունին կրկնեց ԱՀ ՄԻՊ Արտակ Բեգլարյանի հայտարարությունը, որ արդեն կան հաջողություններ, և որոշակի քանակի մարմիններ դուրս են հանվել Շուշիի մերձակա որոշ տարածքներից:

«Շուշիի տարածքներում, դրա շրջանում են իրականացվում դիերի դուրսբերման գործընթացը։ Տեղանքների մասին տեղեկությունները և թե որտե՞ղ կշարունակվի դա՝ ճիշտ կլինի դիմեք ՊՆ։ Մենք ուղղակի օգնում ենք»,- ասաց Ամատունին։

Նշենք, որ խաղաղապահներն ապահովում են անվտանգության հարցը, ԿԽՄԿ-ն՝ մարդասիրական, իսկ բուն որոնողական աշխատանքը կատարում են զինվորականները։

Ամատունին հայտնեց, որ զոհվածների նույնականացումը ևս կատարվելու է զինվորական համապատասխան ուժերով, որոնք էլ կատարում են աշխատանքների հիմնական ծավալը։

«Մենք որևէ որոնողական և դուրսբերման աշխատանքներում ներգրավված չենք։ Երեկվա դրությամբ մենք ներկա ենք գտնվել որպես մարդասիրական կողմ՝ գործընթացի արտահանձման փուլում։ Իսկ որոնողական և դուրսբերման աշխատանքներ կատարել են կողմերի՝ հայկական և ադրբեջանական զինվորական ստորաբաժանումները»։

Ադրբեջանական կողմի դիերի քանակի մասին Ամատունին ևս ինֆորմացիա չտրամադրեց, որովհետև կոմիտեն չեզոք է և կողմերի մասին տվյալներ չեն հրապարակում։ ԿԽՄԿ աջակցում է կողմերին և կողմերն են որոշում հրապարակել տվյալներ թե ոչ, և ի՞նչ թվեր հրապարակել։ Ամատունին հավելեց, որ այսօր շարունակվում է գործողությունները նույն տեղամաում, և դժվար է ասել՝ որքա՞ն ժամանակ անհրաժեշտ կլինի ամբողջական գործընթացը կատարելու համար։

«Մեր պատկերացումներով, քանի որ այս գործընթացը ընթացիկ է, մենք չենք կարող այս պահին ասել՝ քանի օր անհրաժեշտ կլինի»։

Իսկ արդյոք քննարկվե՞լ է այն հարցը, թե առաջիկայում Ադրբեջանին հանձնվող տարածքներում չէր պետք առաջնային կազմակերպել մարմինների դուրսբերում, Ամատունին նշեց, որ այստեղ էլ են կողմերը որոշողի դերում եղել։

«Մեկնաբանել, թե ինչպիսի առաջարկներ են քննարկվել՝ բովանդակային մասով չեմ կարող, բայց գործընթացը երկկողմանի բնույթ է կրում, ինչը նշանակում է, որ երկու կողմից էլ համաձայնություններ են ձեռք բերվել և աշխատանքները միաժամանակյա են։ Եվ հայկական, և ադրբեջանական համապատասխան զինվորականներն աշխատում են նույն տեղանքում, նույն ժամանակահատվածում»։

Ռազմագերիների փոխանակման մասին խոսելիս, Ամատունին նշեց, որ երկխոսության տեսքով են քննարկումներ ընթանում, կողմերի հետ շարունակում ենք խոսել և այս հարցը շարունակում է կոմիտեի ուշադրության կենտրոնում մնալ։

«Այս պահին նքննարկումների փուլում ենք, մենք պատրաստակամ ենք, եթե լինի պայմանավորվածություն, պատրաստ ենք անմիջապես այս հարցում անմիջական ակտիվ ներգրավվածություն ունենալ, բայց այս պահին քննարկում ենք, հաջորդ քայլն արդեն ըստ զարգացումների կտեղեկացնենք։ Բայց գործողությունների անցնելու առումով դեռևս որևէ հաստատում չունենք»,- նշեց Ամատունին։

Աղբյուր` Փաստինֆո