Փաստ ինֆո

Արցախի հարցի շուրջ բանակցություններում պետք է նոր բանակցող թիմ, որը կկարողանա ինչ-որ նոր կետից շարունակել բանակցությունները,- «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը:

Նշենք, որ «Փաստինֆո»-ի հետ զրույցում իրավաբանական գիտությունների դոկտոր Գևորգ Դանիելյանը հայտնել էր, որ վարչապետի՝ նոյեմբերի 10-ին ստորագրած Արցախի կապիտուլացիայի վերաբերյալ փաստաթղթում կան դրույթներ, որոնք իրավական ուժ կարող են ստանալ բացառապես Սահմանադրական դատարանի դրական որոշման հիմքով Ազգային ժողովի կողմից վավերացվելու պարագայում։ Մասնավորապես` անկախ փաստաթղթի անվանումից, այն բովանդակում է դրույթներ, որոնք չեն կարող իրավական ուժ ձեռք բերել ցանկացած պաշտոնյայի կողմից ստորագրվելու դեպքում: Դրանով ամրագրված պարտավորություններն ունեն քաղաքական և ռազմական բնույթ կրող, հետեւապես` Սահմանադրության 116-րդ հոդվածի 1-ին մասի 2-րդ կետի համաձայն, ենթակա են պարտադիր վավերացման։

Ստորագրված հայտարարությունը կարող է իրավական ուժ ձեռք բերել բացառապես Սահմանադրական դատարանի դրական որոշման հիմքով Ազգային ժողովի կողմից վավերացվելու պարագայում։

Սակայն վարչապետը հայտարարել է, որ այն հայտարարություն է ու վավերացման ենթակա չէ, չի պատրաստվում դիմել ՍԴ: Ինչու վարչապետը չի օգտվում խնդրի լուծման այս հնարավորություններից՝ փաստաթղթի գոնե որոշ կետեր բարելավելու համար, ինչպես պահանջում է ժողովուրդը:

«Վարչապետը իր ստորագրությունն է դրել այդ փաստաթղթի տակ, դա նշանակում է, որ պարտավորություն է վերցրել դրանք իրականացնելու համար, գուցե նաև դրա հիման վրա որոշակի երաշխիքներ է ստացել միջազգային ուժային կառույցներից, այդ պատճառով էլ նա շահագրգիռ է, որ փաստաթուղթը առանց որևէ խոչընդոտի ուժի մեջ մտնի:Կարծում եմ , բայց այդ երաշխքիները, որը նա ստացել է, իրենց ուժը կկորցնեն, երբ ինքը այդ փաստաթղթով սահմանված պարտավորությունները՝ տարածքների հանձնման կատարի:Դրանից հետո չեմ կարծում ինքը պետք կլինի այդ ուժային կառույցների համար այլևս»,-մեզ հետ զրույց ասաց քաղտեխնոլոգը:

Նրա գնահատմամբ` ամեն դեպքում այդ փաստաթուղթը հնարավոր չէ չեղարկել, որովհետև չեղարկելուց հետո այլ քայլեր պիտի լինեն, օրինակ՝ պատերազմի վերսկսում, բացի դա ռուսական խաղաղապահ զորքերն արդեն այնտեղ են: «Շատ կարևոր է, որ երկրի ղեկավարը, որը երկիրը հասցրել է պարտության և կապիտուլացիա է ստորագրել, հեռանա, ես չեմ կարծում, որ այսօրվա իրավիճակից կարողանանք դուրս գալ այս ղեկավարի օրոք, որը երկիրը հասցրել է կոլապսի և հսկայական տարածքային կորուստների»,-ասաց Վիգեն Հակոբյանը:
Քաղտեխնոլոգի արձանագրմամբ` ընդհանրապես ընդունված չէ, որ կապիտուլացիա ստորագրած ղեկավարը, հույս ունենա, որ կարող է պաշտոնավորել և իր օրոք հասցրած կորուստները վերականգնել:

«Արցախի հարցի շուրջ բանակցությունները շարունակվում են,իսկ այստեղ պետք է նոր բանակցող թիմ, որի վրա պարտվողականության, բացահայտ և գաղտնի պարտավորությունների կատարման բեռ չի լինի և կկարողանա ինչ-որ նոր կետից շարունակի բանակցությունները թե գործընկերների, թե հակառակորդի հետ»,-ասաց Վիգեն Հակոբյանը:

Քաղաքագետը ընդգծեց որ պարտության հասցրած և կապիտուլացիա արձանագրած ղեկավարի օրոք իրավիճակը չի կարող կայունանալ, քանի որ անընդհատ մեղավորներ փնտրելու կոմպլեքսը շարունակելու է մնալ և պետք է ժամանակավոր լուծում տալ.

«Կարելի է ստեղծել ժամանակավոր կառավարություն, դա կարող է լինել կոմպրոմիսային կառույց և նախագահ Արմեն Սարգսյանը մի քանի ամսով կարող է լինել կառավարության ղեկավարը, որը ունենա բազմակուսակցական կազմ:Այս ժամանակավոր կառավարությունը կարող է կայունացնել վիճակը, որից հետո կարել է կազմակերպել խորհրդարանական արտահերթ ընտրություններ, այնուհետև կունենանք էլեկտորալ գործընթացի արդյունքում ձևավորված իշխանություն»,-մեզ հետ զրույցում ասաց Վիգեն Հակոբյանը:

Աղբյուր` Փաստինֆո