Փաստ ինֆո

Նիկոլ Փաշինյանի՝ Արցախի և Հայաստանի թիկունքում ստորագրած նվաստացուցիչ, խայտառակ համաձայնագրին նախորդեց բարձրաստիճան զինվորականի՝ ՀՀ ԱԱԾ տնօրենի պաշտոնակատար, ԱԱԾ գնդապետ Միքայել Համբարձումյանի հրաժարականը՝ այդպիսով իսկ օդում կախված բազմաթիվ հարցեր թողնելով: Նախօրեին Մ. Համբարձումյանն անդրադառնալով իր հրաժարականի պատճառներին և առիթներին, բավական ուշագրավ մանրամասներ է ներկայացրել, որոնց զգալի մասին, վստահաբար, ներկա կառավարության մեջ այլ բարձրաստիճան պաշտոնյաներ ևս համաձայն կլինեին: Այն, ինչ նկատել է ԱԱԾ պետը, գուցե հատուկ դիտողունակություն չի պահանջում, բայց ամեն մեկը չէ պետական համակարգում, որ կհանդգնի բարձրաձայնել:

Մի կողմից նրբանկատորեն անադար համարելով Փաշինյանին դավաճանի պիտակով խարազանելը, նա պատկերավոր կերպով ներկայացրել է, թե ինչպիսի վարչապետ է ընտրել ժողովուրդը: «Այո', նա որպես երկրի ղեկավար գուցե վատ կառավարիչ է, դյուրագրգիռ է, առանձին դեպքերում որոշումներ է կայացնում անարդար` պահի ազդեցության տակ, որպես գերագույն գլխավոր հրամանատար` չունի բավարար ռազմական փորձ ու գիտելիքներ, դիվանագիտության մեջ` անհրաժեշտ ճկունություն և հեռատեսություն, անարդարացիորեն անտեսում կամ ներում է իր հետ իշխանության եկած յուրայինների բոլոր` նույնիսկ երկրի համար հետևանքներ առաջացնող սխալները, և հակառակը` չխորանալով իրական պատճառների, հանգամանքների մեջ, կարող է խիստ միջոցներ ձեռնարկել իրեն տարակարծություն հայտնած կամ չնչին սխալներ թույլ տված, կառավարման համակարգում երկարամյա փորձ ունեցող, սակայն քաղաքական թիմի անդամ չհանդիսացող մարդկանց նկատմամբ»:

Այսինքն, վատ կառավարիչ -վարչապետ ունենալն արդեն իսկ լրջագույն խնդիր է, քանի որ վարչապետն առաջին հերթին հենց լավ կառավարիչ է, որ պիտի լինի: Բայց չլինելով այդպիսին, նա, պարզվում է և՛ իր մարդկային որակներով, և՛ հմտություններով ու գիտելիքի պաշարով, ավելին, որոշումներ կայացնելու ընթացքում՝ արդարության սկզբունքով չառաջնորդվելով բազմաթիվ սխալներ է գործում, որոնք ճակատագրական են լինում պետության և ազգի համար:

Մեր ժողովուրդը ճակատագրական օրեր է ապրում, որի պատասխանատուն այսօր հենց գերագույն գլխավոր հրամանատար համարվող Փաշինյանն է: Որքան էլ նրան հաճոյանան իր շրջապատի մարդիկ, այնուհանդերձ հստակ է՝ նա բավարար ռազմական փորձ ու հմտություն չունի: Այսինքն, այս բնագծում նույնպես տանուլ է տալիս Փաշինյանը: Ցավոք, ԱԱԾ պետը նկատել է, որ իբրև դիվանագիտական հարթության մեջ էլ նա կաղում է, քանզի ոչ ճկուն է, ոչ հեռատես, ավելին, շատ հստակ սահման է դնում յուրայինների և ոչ յուրայինների միջև՝ առաջինների հանցանքներն իսկ ներելով, իսկ երկրորդների հանդեպ չնչին սխալների համար անգամ խիստ միջոցներ կիրառելով: Ընդ որում, նրա այդօրինակ սխալները ճակատագրական են լինում պետության և ազգի համար:

Տեսեք, Մ. Համբարձումյանի դեպքն արդեն ԱԱԾ տնօրենի ինքնակամ հրաժարականի երկրորդ դեպքն է, առաջինը Արթուր Վանեցյանն էր, որը հրաժարական տալով Փաշինյանին ուղղակի կոչ էր արել, զգուշացրել՝ կանգ առ… Ավաղ, նույն պաշտոնն զբաղեցնող երկրորդ բարձրաստիճան սպան է հրաժարական տալիս՝ Փաշինյան-վարչապետի կողմից կատարված, ըստ էության, լրջագույն հանցագործություններ մատնանշելով, սակայն վերջինս կանգ չի առնում:

ԱԱԾ նախկին ղեկավարն այդ համատեքստում առանձնացնում է քաղաքական ձերբակալություններն ու հաշվեհարդարները ընդդիմության ներկայացուցիչների հետ, որոնք այս օրերին բավական ինտենսիվ շարունակվում են՝ հստակ ցուցանելով, որ նա ոչնչի առջև կանգ չի առնելու:

Բայց եկեք տեսեք, որ այս համապատկերում, երբ, ըստ էության բացարձակ անգործության է մատնված ողջ օրենսդիր և գործադիր իշխանությունը, կառավարության անդամները գլուխները ջայլամի պես ավազի մեջ մտցրած պապանձվել են, իսկ օրենսդիրի իշխանական ներկայացուցիչները լռելյայն արդարացնում են Փաշինյանի ստորագրած փաստաթուղթը: Նրանցից ընդամենը մեկ պատգամավոր է, որ լքել է իշխանական ,,Իմ քայլը,, խմբակցությունը՝ անհամաձայնություն հայտնելով Փաշինյանի ստորագրած համաձայնագրին: Մեկ պատգամավոր, կառավարության մեկ աշխատակից-խորհրդական: Մնացյալը դեռ լուռ են, մնացյալը՝ համաձայն են և ուրեմն, Փաշինյանի վերը նշված բոլոր թերությունները, արատները և հանցանքները կիսում են: Բնականաբար, կիսում են նաև Փաշինյանի ձեռքով՝ հայության համար ստորագրված կապիտուլյացիոն պայմանագիրը:

Իր ազատմանն անդրադառնալով՝ ԱԱԾ արդեն նախկին պետը Փաշինյանին, ըստ էության հրաժարականի և ՝ առկա իրականության հետ առերեսվելու կոչ էր արել:
Փաշինյանը, ցավոք, բունկերում և ուժայինների հետևում թաքնված՝ ոչ ընդդիմության ձայնն է լսում, ոչ էլ՝ իշխանության մեջ եղած հատուկենտ իրատես և համարձակ անձանց:

Աղբյուր` Փաստինֆո