Փաստ ինֆո

Լեռնային Ղարաբաղում պատերազմն ավարտված է։ Էթնիկ հայերը շտապում են լքել հայրենիքը, որը շուտով Ադրբեջանի կազմում է լինելու։ BBC հեղինակավոր լրատվականն անդրադարձել է արցախյան պատերազմից հետո այնտեղ գտնվող մարդկանց ճակատագրերին։

Լրագրողը հանդիպել է հայ զինվորներին, զրուցել նրանց հետ։ Պատմում է, որ նրանց համար բարդ է, որովհետև բոլորը կորցրել են իրենց ընկերներին։ Բայց նրանք ինչ-որ տեղ հանգիստ են, որ վեց շաբաթ տևած արյունալի պատերազմն ավարտվեց։

«Եթե այստեղ պատերազմը չավարտվեր, բոլորս էինք զոհվելու։ Ադրբեջանն ունի ավելի շատ փող, ավելի շատ զենք»,- լրագրողին պատմում է հայ զինվորը։

Լրագրողը հիշեցնում է՝ Հայաստանն ունի մեկ շաբաթ՝ ազատելու այս հողերը։ Հանդիպում է Սարգիսին, որը հավաքում է իրերը՝ վերցնելով իր հետ բառացիորեն ամեն ինչ։ Նա հեռացրել է անգամ տան պատուհանները։

«Ես այնքան ցավ եմ զգում, դուք չեք էլ պատկերացնի։ Ես չգիտեմ ուր գնամ, ես 7 երեխա ունեմ, բայց տուն չունեմ»,- լրագրողին ասաց Սարգիսը։

Մոտակա հայկական եկեղեցում լուռ աղոթում էին բնակիչները, բայց մի քանի օրից Ադրբեջանը կտիրանա այդ հողին, այդ եկեղեցուն։ Լրագրողը մեջբերում է այն մարդկանց խոսքերը՝ «Դադիվանքն ապացուցում է, որ այս հողը Հայկական է։ Բայց Կովկասում պատմությունը բարդ է։ Միայն 30 տարի առաջ Դադիվանքն ադրբեջանական էր, մինչև հայկական զորքերը այն չվերադարձրեցին։ Եվ նրանք հիմա պարտավոր են հեռանալ»։

Որոշ հայեր անգամ որոշել են իրենց հետևում ոչինչ թողնել։ Բադալյանների ընտանիքը այրում էր իրենց տունը, որ ոչ մի ադրբեջանցի չկարողանա այնտեղ բնակվել։

«Իմ արած դրածը ես թողեմ գնա՞մ , ես չեմ կարող այն որևէ մեկին թողնել։ Մենք այստեղից կտանենք այն, ինչ կկարողանանք ու ես տունը պարզապես կայրեմ։ Եթե իմ երեխաները չեն կարող այստեղ ապրել, ապա ոչ ոք չի ապրի»։

Լրագրողը պատմում է. «ոչ մի բան այս մարդիկ չեն կարող անել այս համաձայնագրի մասով, չեն կարող ոչինչ անել, որ չկորցնեն իրենց հողը։ Միակ բանը որ կարող են անել ՝ վստահ լինել, որ ոչինչ չեն թողնում ադրբեջանցիներին։ Համաձայնագիրը գուցե դադարեցրեց պատերազմը, բայց ատելությունը շարունակվում է վառվել»։

Աղբյուր` Փաստինֆո