Փաստ ինֆո

Այս ձերբակալությունները խայտառակություն են, ոտքից գլուխ սարքովի, քաղաքական ձերբակալություններ, որոնց նպատակը հայ ժողովրդին շեղելն է։ Լրագրողների հետ զրույցում այս մասին ասաց ՀՀԿ խոսնակ Էդուարդ Շարմազանովը։

Նա նշեց, որ այսօր փաստաբանի հետ գնացել է ՀՔԾ և նրա նկատմամբ որպես խափանման միջոց ստորագրություն է ընտրվել։

«Չեն կարողանալու ձերբակալություններով, բերման ենթարկելով մեզ վախեցնել։ Մենք այնքան մեծ կորուստներ ենք տվել, մեր ձերբակալությունները զրո է այն մարդկային ու տարածքային կորուստների առջև, որ կան։ 950 հազ. հա հող են հանձնել, ստորագրել է դրա տակ այն դեպքում, երբ պատերազմից առաջ Ալիևը չէր էլ կարող երազել, որ նման վերջաբան կլինի։

Ալիևի երազանքը եղել է 5+2-ը։ Հինգը սկզբում, երկուսն էլ տարիների ընթացքում։ Հիմա ունենք 5+2, ունենք հանձնված Հադրութ, Շուշի, Թալիշ, Մատաղիս, Դադիվանք և հազարավոր մարդկային կորուստներ, որից կարելի էր հնարավորինս խուսափել, եթե իշխանության գլխին կանգնած մարդը մտածեր ոչ թե իր աթոռը պահելու մասին, ոչ թե լայքեր հավաքելու մասին, այլ մտածեր պետության անվտանգությանը ծառայելու մասին»,-ասաց Էդուարդ Շարմազանովը՝ նշելով, որ Նիկոլ Փաշինյանը պետք է հրաժարական տա, քանի որ նա այլևս ի վիճակի չէ ապահովելու Հայաստանի անվտանգությունը։

Անդրադառնալով ՀՀ վարչապետի մամուլի խոսնակի այն հայտարարությանը, որ թե՛ խորհրդարանական, թե՛ արտախորհրդարանական ուժերը լավ տեղեկացված են եղել իրավիճակին, Էդուարդ Շարմազանովն արձագանքեց. «Դա լկտի սուտ է։ Ո՞նց են դրա մասին խոսում, երբ ես վարչապետին հանդիպել եմ հոկտեմբերի 19-ին և այդ ժամանակ Շուշիի մասին խոսք չկար։ Իրենց ասելով Շուշիից թուրքը 100-200 կմ հեռու էր։

Մինչև վերջին պահը վարչապետն ասում էր՝ Շուշին մեր վերահսկողության տակ է։ Մեր հանդիպումների ժամանակ մենք ենք մտահոգություն հայտնել, որ վիճակը լավ չէ և պետք է հնարավորինս կանգնեցնել պատերազմը, դիմել մեր ռազմավարական դաշնակցին և մարդկային ու տարածքային հնարավորինս քիչ կորուստներով ավարտել այս պատերազմը։ Որևէ կոնկրետ պատասխան չենք ստացել։ Ստացել ենք այն, որ ամեն օր պաշտոնական քարոզչությունն ասել է՝ հաղթում ենք, հաղթելու ենք, քարտեզներ էին ցույց տալիս, բայց դուրս եկավ՝ քարտեզը շուռ տված են ցույց տվել հայ ժողովրդին»,-նշեց Էուարդ Շարմազանովը։

Աղբյուր` Փաստինֆո