Փաստ ինֆո

«Ես ուզում եմ հասկանալ ի՞նչ պետք է արվի։ Ունենք մի իրավիճակ, որից պետք է անցնցում լուծումներ գտնենք։ Կա՞ իրավական ճանապարհ, թե չկա։ Իրավական ճանապարհներ ասվածը մանիպուլյացիա է, թե իրականությո՞ւն։ Փաստացի մի կողմն ասում է, որ ԱԺ-ը կարող է չեղարկել հայտարարությունը, մեծամասնությունն ասում է, որ հնարավոր չէ և իրապես կանոնակարգ օրենքով հնարավոր չէ»,- այս մասին «Փաստինֆո»-ի հետ զրույցում հայտնեց ԱԺ Իմ քայլը խմբակցության պատգամավոր Սոֆյա Հովսեփյանը։

Պատգամավորը տեղեկացրել էր, թե ունեցել է բազմաթիվ հանդիպումներ, որպեսզի հասկանա ստեղծված իրավիճակից դուրս գալու ճանապարհը։ Նրա կարծիքով, հարցերը պետք է պարզեն ու ժողովրդին չխաբեն։

«Հիմա բոլորը ակնկալում են, որ ես պետք է լինեմ ԱԺ-ում։ Ես խնդիր չունեմ ԱԺ-ում լինելու, բայց ինձ մոտ առաջանում է հարց՝ իսկ ի՞նչ եմ անելու, եթե չունեմ այդ իրավական լծակը, եթե չունեմ հնրավորություն այդ հայտարարության չեղարկման։ Ի՞նչ պետք է անեմ»։
Հարցին, թե ինչո՞ւ համենայնդեպս չի ներկայանում ԱԺ՝ հուսով, որ գուցե ներկա պատգամավորների հետ միասին կարողանան լուծում գտնել՝ նշեց, որ իր կարծիքով ԱԺ-ում այդ պատասխանները չեն գտնի։

«Կարծում եմ, որ այդ հարցերի շատ պատասխաններն այս պահին ոչ թե ԱԺ-ի պատերի ներսում են, այլ դրսում։ Որովհետև նախ պետք է հաշվի առնենք, որ իմ գործողությունները կաշկանդված են այնքանով, որքանով որ մենք դեռ ունենք այնտեղ որոշակի տարածքներում զինվորի անվտանգության ապահովման հարց, սա շատ լուրջ խնդիր է, որ եթե շատերը չենք գիտակցում, ես չեմ կարող բացահայտ խոսել։ Մենք ունենք այստեղ Արցախի ժողովրդի անվտանգության հարց։ Եթե էմոցիոնալ մոտենանք հարցին, էական է այնքանով, որ այդ ժողովրդին նույնպես պետք է տանք հնարավորություն անվտանգ մուտքի և ելքի։ Եվ երրորդը՝ ունենք հարցեր, որոնք որ պետք է հասկանանք լուծումները որո՞նք են։ Չեմ ասում անլուծելի են, որովհետև ինձ անգամ թույլ չեմ տալիս դա մտածել։ Եթե այս պահին պետք է մտածել, որ հարցն անլուծելի է և մնա այսպես, ուրեմն ավելի լավ է չապրեմ առհասարակ, քան այս երկրում որևէ մի րոպե գոյություն ունենամ»։
Ըստ պատգամավորի՝ հարցը պետք է լուծվի և շատ արագ՝ մեկ վայկյան չկորցնելով անիմաստ գործողությունների վրա։
«Ես զարմացած եմ, որ պետք է փոխանակ բոլորս մոբիլիզացվենք արագ լուծում գտնենք, մենք այս պահին, քավ լիցի ուզում են վարչապետի հրաժարական, թող ուզեն, բայց հարցը կարգավորել է պետք։ Եթե մենք հիմա գնում ենք ցնցումների՝ ապա այս հարցի կարգավորումը ոչ թե մեկ օր, այլ տարիներ է ձգվելու։ Եթե մենք հիմա գնում ենք ցնցումների՝ այս հարցի կարևորությունը մոռացության ենք մատնելու։ Պետք է հասկանանք կարելի է շեղել խնդրից, թե ոչ, պետք է հասկանանք և խնդրին լուծում գտնենք, օգնենք, պահանջենք, ստիպենք, կանգնենք բանակի կողքին, պետք է զենք վերցնենք, բայց պետք է այս հարցը լուծենք։ Հարցի լուծումն օրհասական է»։
Սոֆյա Հովսեփյանը նշեց, որ հանդիպել է հնարավոր բոլորի հետ՝ քաղաքական և ոչ քաղաքական անձանց, հոգևորականներից սկսած մինչև այն բոլոր մարդկանց, ում որ այս հարցն անհանգստացնում է, կամ ովքեր որ կարող են լուծում ունենալ։ Իսկ հարցին, թե հնարավո՞ր է արդյոք կապվի վարչապետի հետ պատասխանները գտնելու համար, տեղեկացրեց, որ չի մտածել այդ մասին։
«Անկեղծ ասած քայլ չեմ արել, փորձ չեմ արել, գիտակցելով՝ կա անվտանգության հարց և այլն։ Չգիտեմ հնարավոր է, թե ոչ։ Ես այդ հարցի պատասխանը չունեմ, չեմ էլ մտածել այդ հարցի շուրջ՝ հասկանալով, որ չեմ կարող անվտանգության խնդիր լուծել և եթե չեմ կարող, ապա իրավունք չունեմ որևէ կերպ որևէ խնդիր առաջացնել։ Խնդիրները շատ են և կարծում եմ, եղածով բավարարվել է պետք և նոր խնդիրներ չստեղծել»։
ՀՀ ԱԺ «Իմ քայլը» խմբակցությունը հայտարարությունից հետո իմքայլական պատգամավորը համացանցում շրջանառվող հայտարարության մեկնաբանություններում նշել էր, որ ինքը տեքստի առաջին մասին է ծանոթ, մնացածը հավելվել է, որին ծանոթ չի եղել և ինչպես հասկացել է նաև մեծամասնությունը։ Պատգամավորը մեկնաբանեց՝ դա հիմա էական չէ։

«Հայտարարությունը, եթե գնացել է խմբակցության անունից, կապ չունի որ մասին եմ ծանոթ, պատասխանատու ենք դառնում բոլորս։ Էստեղ փնտրել մեղավորներ կամ ինչ որ բաներ, ամենափոքր հարցն է սա այս պահին։ Իմ ֆիքսվածությունը Արցախին վերաբերող հայտարարությունն է, և ոչ թե քաղաքական թիմի հայտարարության բովանդակության ոչ ամբողջական լինելը։ Եվ այն ինչին մասնակցել եմ, ստորագրությամբ չէ, ընդամենը քննարկմանն եմ մասնակցել, քննարկվել է առաջին մասը և հետո ես դուրս եմ եկել, այլ հանդիպման։ Գուցե քննարկվել է և վերջնական տարբերակը բոլորի հետ, բայց ես անձամբ տեղյակ չեմ եղել վերջին մասին և հայտարարությունը տեսել եմ այն ժամանակ, երբ որ արդեն հայտնվել է համացանցում»,- եզրափակեց պատգամավորը։

Աղբյուր` Փաստինֆո