Փաստ ինֆո

«Ժառանգություն՚» կուսակցությունը հանդես է եկել հայտարարությամբ.

«Երեկ և այսօր Ազատության հրապարակում խաղաղ  հանրահավաքների կազմակերպիչների ու մասնակիցների հանդեպ ՀՀ վարչապետին ենթակա ոստիկանության կողմից ուժի բիրտ կիրառումը, որն այսօր ուղեկցվեց հայոց եռագույնի հանդեպ անհարգալիր վերաբերմունքով, արժանի են անհապաղ դատապարտման և կասեցման:  

«Ժառանգություն» կուսակցությունը պահանջում է խաղաղ երթը չեղարկողներին  հարձակման ենթարկած և  ՀՀ  դրոշը արհամարհանքով խլած ու նսեմացրած ոստիկաններին՝ անկախ իրենց դիմակներից, բացահայտել և օրենքի ողջ խստությամբ պատժել:

  «Ժառանգությունն» արձանագրում է, որ  քողարկվելով ռազմական դրության օրենքի դրույթներով՝ ՀՀ իշխանությունը կոպտորեն ոտնահարում է ՀՀ քաղաքացիների ազատ ու խաղաղ կամարտահայտման իրավունքը մեր հայրենիքի համար վճռորոշ այս պահին՝ ժողովրդի ձայնը լռեցնելն անհնար է:

Նիկոլ Փաշինյանը թուղթ է ստորագրել պատերազմի դադարեցման մասին, հրապարակավ համոզում է, թե խաղաղություն է  բերել Հայաստան ու Արցախ, այդ դեպքում ինչի՞ համար է ռազմական դրության պահպանումը: Ժողովրդավարության ու ազատության կարգախոսներով իշխանության եկած  վարչապետը և իր ղեկավարած քաղաքական ուժը պետք է հասկանան, որ վճռական ընտրության առջև են, եթե շարունակեն բիրտ ուժ կիրառել ընդդիմախոսների հանդեպ, ապա Հայաստանը կհայտնվի քաղաքացիական պատերազմում, իսկ դա աններելի քայլ է: Հայաստանում բռնությունը պետք է բացառվի, ժողովրդի ազատ կամարտահայտումն այլընտրանք չունի»:

Աղբյուր` Փաստինֆո