Փաստ ինֆո

Թուրքիայի ակտիվ ներգրավվածություն և շահերի աստիճանը տեսանելի է ոչ միայն Ղարաբաղյան կոնֆլիկտի կարգավորման, այլ ընդհանրապես՝ որպես տարածաշրջանում դերակատարողի առումով,-այս մասին «Փաստինֆո»,-ի հետ զրույցում ասաց քաղաքագետ Ալեքսանդր Մարգարովը:

Նշենք, որ նախօրեին հայտարարվեց Ռուսաստանի և Թուրքայի՝ հրադադարի ռեժիմը վերահսկող համատեղ կենտրոն ստեղծելու որոշման մասին՝փորձագետը նկատում է, որ Թուրքիան ամեն կերպ փորձում է իր ներգրավվածությունն ունենալ հետռազմական գործողությունների փուլում՝մասնակցելով կառուցման և շինարարական աշխատաքներին, փորձում է համապատասխանորեն դերակատարում ունենալ նաև մշտադիտարկման առաքելության մեջ:

«Այն ինչի մասին Թուրքան խոսում էր ամբողջ այս թեժ փուլի ժամանակ, հիմա նրանք փորձում են կյանքի կոչել, այն տեսանկյունից, որ փորձելու են ունենալ սահմանափակ ներկայացվածություն, թեկուզ՝ ադրբեջանական կողմից: Այս տեսանկյունից քաղաքականությունը, որը Թուրքիան վարում էր, տրամաբանորեն շարունակվում է: Ճիշտ է խաղաղապահ ուժերի մեջ, բայց ամեն դեպքում նրանց ներգրավվածությունը հակառակ կողմից շարունակվում է»,մեզ հետ զրույցում ասաց Ալեքսանդր Մարգարովը:

Վերջինիս հավաստմամբ՝սա ապացույց է, որ թուրքադրբեջանական տանդեմը ոչ մի տեղ չի կորել, մյուս կողմից՝ թուրքական գործոնը ադրբեջանական քաղաքականության մեջ շարունակում է մնալ դոմինանտ:

«Դա նաև ցույց է տալիս, որ Ռուսաստանը, ունենալով իր շահը մեր տարածաշրջանում, բնականաբար, իր գերակայությունների շրջանակում, դրսևորում է համապատասխան վարք, որտեղ իրենք ցույց են տալիս համընկման կետեր՝ միաժամանակ ցույց տալով նաև մոտեցումների տարբերությունները»,-ասաց քաղաքագետը:
Մեզ հետ զրույցում Ալեքսանդր Մարգարովը նաև շեշտեց, որ Թուրքիան փորձում է ստանալ ներկայացվածության շոշափելի դրսևորումներ, իսկ մյուս կողմից դա մեծ քաղաքական խաղի մասն է, որի մեջ ներգրավված է նաև Ռուսաստանը:

Աղբյուր` Փաստինֆո