Փաստ ինֆո

Նախօրեին տարածված հայտարարությամբ «Իմ քայլը» խմբակցության այն անդամները, որոնք համարձակություն կունենան հայտարարելու, որ իրենք ստորագրում են այս հայտարարության տակ, հավասարապես կիսում են պատասխանատվությունը։ Այս մասին մամուլի ասուլիսի ժամանակ ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը։

«Այս պահին տեղեկատվություն ունեմ, որ ֆեյսբուքյան քոմենթների մակարդակով «Իմ քայլը» խմբակցության մի քանի պատգամավորներ արդեն իսկ նշում են, որ իրենք տեղյակ չեն եղել կամ տեղյակ են եղել հայտարարության առաջին հատվածին և մնացած մասով տեղյակ չեն ու պատասխանատվություն չեն կրում։

Ակնկալում եմ «Իմ քայլ»-ի գործընկերներից, որպեսզի բոլորն անվանական հայտարարեն, թե ով է ստորագրել երեկ տարածված հաղորդագրության տակ, որպեսզի հասկանանք, թե ովքեր են այն ԱԺ պատգամավորները, որոնք Նիկոլ Փաշինյանի հետ միասին հավասարապես կիսում են Արցախը հանձնելու որոշման պատասխանատվությունը։ Ազգը պետք է անուն առ անուն իմանա բոլոր այն մարդկանց, ովքեր ստորագրել են այս խայտառակ որոշման տակ»,-ասաց Իվետա Տոնոյանը՝ իշխանական գործընկերներին հորդորելով դուրս չգալ ժողովրդի դեմ, թողնեն հնարավորություն, որ իրենք կարողանան նրանց փրկել ժողովրդի ցասումից ու զայրույթից։

Իվետա Տոնոյանը նկատեց՝ փորձում են մանիպուլյացիաներ իրականացնել «Իմ քայլը» խմբակցության այն պատգամավորները, որոնք հեղինակել էին այդ հայտարարությունը՝ փորձելով հակասություն փնտրել ընդդիմադիր ուժերի՝ ՌԴ-ի հետ կապված հարաբերություններում. «Խորապես ցավում եմ, որ «Իմ քայլը» խմբակցությանը թվում է, թե իրենք նման պրիմիտիվ մանիպուլյացիաներով կարող են հանրությանը ուշադրությունը շեղել հիմնական օրակարգից»,-ասաց Իվետա Տոնոյանը։

Աղբյուր` Փաստինֆո