Փաստ ինֆո

Արցախի նախագահ Արայիկ Հարությունյանը քիչ առաջ ֆեյսբուքով եթեր էր մտել ու պարտության մեջ մեղադրեց ժողովրդին` ռազմական գործողություններին չմասնակցելու համար:

«Ես հիմա կասեմ, ովքեր են դավաճանները, ովքեր են հող ծախողները։ Առաջին անգամ ես ահազանգել եմ հոկտեմբերի երեքին, երբ հակառակորդը գրավել էր Մատաղիսը եւ Թալիշը, ու վտանգված էր մեր հյուսիսային ամբողջ հատվածը, երբ Եղնիկներ կոչեցյալ տեղամասից մեր զորքի մի մասը խուճապահար փախչում էր, չունեինք մարդկային ռեսուրսներ, որպեսզի գոնե Եղնիկներում գտնվող մեր տղաների թիկունքը պահեինք։ Եւ այդ օրը վաղ առավոտյան ես կոչ եմ արել եւ ասել՝ գնում եմ առաջնագիծ»։

Արայիկ Հարությունյանը նշեց, թե այդ օրը, երբ հատուկ ստորաբաժանումների հետ պետք է գնային` ՀՀ-ից եկած ԱԱԾ-ի մեր ամենաուժեղ ստորաբաժանումները, Արցախի ստորաբաժանումները, հրաժարվել են գնալ Եղնիկներ։ «Խնդրել եմ, աղաչել եմ, ասել եմ ես եմ գնալու, ստացել եմ բացասական պատասխան, չեն եկել, թողել են երկրի նախագահին մենակ՝ առաջնագիծ գնալու ժամանակ»,- ասաց Հարությունյանը։

Նկատենք, որ առաջնագիծ մեկնելուց հետո Արայիկ Հարությունյանը լուսանկար էր հրապարակել` զինվորների հետ սուրճ խմելիս: Իսկ ՀՀ ԱԱԾ-ն էլ օրերս հաղորդագրություն տարածեց ԱԱԾ սահամանապահների հերոսությունների մասին, մինչդեռ հողերը թշնամուն տալուց հետո Ա. Հարությունյանը բոլորովաին այլ «իրականություն» է ներկայացնում:

Արայիկ Հարությունյանն այսօր հայտարարեց, թե ստիպված է եղել այս մասին հիմա պատմել, որ քիչ զորք է միացել ու կարողացել են կատարել խնդիրը և դրա շնորհիվ Եղնիկները մեր վերահսկողության տակ են մնացել։

«Հոկտեմբերի երեքին ասել եմ՝ օրհասական վիճակում ենք, մարդկային ռեսուրս է պետք։ Ամեն անգամ զգուշացնում էի՝ ունենք մարդկային ռեսուրսների ալիք։ Օրերս ռուս մի խոշոր ռազմական վերլուծաբան նշել է՝ ղարաբաղյան պատերազմում ուզո՞ւմ եք հաղթել, պետք է մոբիլիզացնել մինչեւ 80-100 հազար մարդ, եթե չէ՝ պարտվելու եք։ Չեմ ուզում թիվ ասել՝ ինչքան մարդ է միացել, զորքին թողել եք մենակ, 18 տարեկաններին թողել եք մենակ։ Այո, կամավորական ջոկատներ կային, մի մասը մինչեւ վերջին պահը կատարել է իր խնդիրը, մի մասը մի օր էլ չի մնացել»,- ասաց Արայիկ Հարությունյանը։

Արայիկ Հարությունյանը չնշեց, թե որքան մարդ է միացել՝ կամավորական թե պահեստազոր։

«Զորքին թողել ենք մենակ, 18 տարեկաններին թողել ենք մենակ, կամավորական շատ ջոկատներ կային, մի մասը մինչև վերջին պահը կատարել են խնդիրը, մի մասը մեկ օր էլ չի մնացել։ Ո՞վ է ծախել հողը․ ծախել ենք ազգովի, դավաճանել ենք մեր զինվորներին, 18-20 տարեկան մեր բալիկներին։ Բոլորս միասին ենք դավաճանել, դավաճան չփնտրե՛ք, այն կանայք, որ իմ ու մնացած ղեկավարների նկատմամբ վայրահաչոց են սկսել։ Միայն զոհվածների հարազատներն իրավունք ունեն բոլորիս անվանել դավաճան»։

Իսկ ինչո՞ւ են պարտավորված զինադադար կնքել, ԱՀ նախագահը նշեց, որովհետև զինվորները շրջափակման վտանգի տակ էին։

«Երբ որ Ստեփանակերտն արդեն պաշտպանող չունեինք, քանի որ զինվորականները գտնվում էին հիմնական առաջնագծում, ո՞ւր էին կամավորականները, մնացած աշխարհազորը, ուր էին իմ սիրելի ստեփանակերտցիները, ովքեր այսօր դավաճաններ են փնտրում։ Չկար Ստեփանակերտը պահող՝ կային մի քանի տասնյակ, կամ 1-2 հարյուր հոգի, 6000 հոգու այդքանով պիտի դիմակայեի՞նք։ Իսկ Ստեփանակերտը գրավելուց հետո ընդամենը մի քանի կիլոմետրից շրջափակում էին մեր ամողջ զորքը։ Հարցրեք զինվորականներին՝ ովքեր են իրենց դավաճանել՝ դավաճանել ենք ազգովի»։

Ի դեպ, պատերազի ընթացքում «Փաստինֆո»-ն մի քանի անգամ հարցմամբ դիմել է ՊՆ-ին` տեղեկանալու, թե ինչպես է ընթանում պահեստազորի զորակոչը, ինչին ի պատասխան նշվել է, որ բնականոն, առանց խոչընդոտների: Ավելին` հարյուրավոր, հազարավոր անձանց այդպես էլ ծանուցագիր չի ուղարկվել, իսկ կամավորները` չեն կանչվել: Ինչու հարցի պատասխանը Ա.Հարությունյանը չի հանրայնացրել: Ավելին` ինքը` Ա.Հարությունյանը, պատերազմի առաջին օրերին հայտարարել էր, որ սփյուռքից տասնյակ հազարավոր կամավորներ ցանկություն են հայտնել` կռվելու: Արդյոք այդ կամավորների տեղափոխումն իրականացվել է` պետական մարմինները լռում են:

Աղբյուր` Փաստինֆո