Փաստ ինֆո

Մեզ մի քանի օր հաջողվել էր հակաօդային ուժերի առումով պաշտպանվել անօդաչու սարքերից, բայց վերջին երկու օրը հակառակորդի նոր տեխնոլոգիաների, թե նոր անօդաչու թռչող սարքերի միջոցով հնարավորություն ունեցան նորից մեծ վնասներ պատճառել մեր զորքին: Այս մասին ուղիղ եթերի ժամանակ հայտարարեց Արցախի Հանրապետության նախագահ Արայիկ Հարությունյանը:

«Շատ մեծ կորուստներ ենք ունեցել մարդկային միայն 2-3 վերջին մի քանի ժամերի ընթացքում Մարտունու շրջանում: Ինչու չհաջողվեց մենք բոլորս պատասխան ենք տալու, քանի որ մենք գիտեինք, որ մեր պաշտպանության բանակն այդ կարիքն ուներ, այդ խնդիրն առկա է: Բոլորս, ովքեր զբաղեցրել ենք պաշտոններ վերջին տասնամյակներում: Ընդհանուր առմամբ բանակի վիճակի առումով պետք է ապագայում և համոզված եմ, որ գնահատականը լինելու է:

Զորքի բարոյահոգեբանական վիճակը շատ լավ չէր, ինչ-որ տեղ ծայրահեղ վատ: Զորքը թութքով, կորոնավիրուսով հյուծված վիճակում 43 օր գտնվում էր առաջնագծում: Չունեինք հնարավորություն փոխելու, հանգստանալու, բուժելու: Ամեն օր մարտական գործողությունների մեջ, ամեն օր զոհեր ու վիրավորներ, հրետանակոծություն: Այդ ամենով, բայց կարողանում էինք դիմադրել, ինչ-որ տեղ 8 պետության զինված ուժերի: Հաստատ միայն Ադրբեջանի դեմ չենք կռվել, հաստատ միայն թուրքական սպայական անձնակազմը կամ զինտեխնիկան չի եղել մարտադաշտում և մարտական գործողությունների ընթացքում: Կռվում էր հայ կամավորը և հայ զինվորը: Խոնարհվում եմ մեր զինվորների առջև: Աշխարհի ամենահերոս տղերքն են եղել»,-նշեց Արայիկ Հարությունյանը՝ հավելելով, որ ստիպված էին, որ ժամկետային զինծառայողների կյանքը խնայեին, փրկեին:

Աղբյուր` Փաստինֆո