Փաստ ինֆո

Սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Արցախում և Հայաստանում ռազմական դրություն և համատարած զորահավաք հայտարարվեց։

Նույն օրը կամավորական մի շարք ջոկատներ շտապեցին առաջնագիծ, մի շարք երիտասարդներ կամավորագրվեցին, մյուներն էլ` սպասեցին, որ զինկոմներն իրենց կանչեն: «Փաստինֆո»-ի տեսախցիկը բազմիցս է ֆիքսել, թե որքան մարդաշատ էին զինկոմները, անգամ արտասվում էին, խնդրում, որ իրենց զորակոչեն, բայց մերժվում էին, կարիքը չկար:
Փոխարենը Հայաստանի պաշտպանությանը համազգային բնույթ հաղորդելու նպատակով աշխարհազոր ստեղծելու մասին օրենք ընդունվեց, կոչեր եղան կամավորության սկզբունքով անդամագրվելու, բայց արդյուքների մասին չհաղորդվեց։

Հոկտեմբերի 5-ին վարչապետ Նիկոլ Փաշինյանը մարտակոչ հնչեցրեց, որով վերջին մեկ տարում զորացրված զինվորներին՝ ամենամարտունակ հատվածին, կոչ արեց ներկայանալ Կենտրոնական հավաքակայան և զինվորագրվել Հայոց բանակին:

«Նրանք պետք է իմանան, որ հրավիրվում են Հայրենիքի համար կենաց- մահու կռիվ տալու»,- ասաց Փաշինյանը:
Դեռեւս այդ օրերին «Փաստինֆո»-ն դիմեց ՊՆ-ին` պարզելու, թե արդյոք պահեստազորի զորակոչի կազմակերպման ընթացկում կան խնդիրներ` նկատի ունենալով, որ պարբերաբար կամավորագրվելու հայտարարություններ էին հնչում` խոսնակի պատասխանը միանշանակ էր. զորակոչն ընթանում է առանց խոչընդոտների։

Նոյեմբերի լույս 9-ի գիշերը վարչապետ Նիկոլ Փաշինյանը հայտարարեց՝ ստորագրել է Արցախի վերաբերյալ փաստաթուղթ, այլ խոսքով «Կապիտուլյացիայի» հայտարարություն։ Վարչապետի մեղադրեց ժողովրդին` քաղաքացիներն այնքան էլ պատրաստ չեն լիարժեք մասնակցելու ռազմական գործողությունների, նրանք արագ կորցնում են մարտունակությունը, ինչը խնդիրներ է առաջացնում։ Այսինքն մեղավեր են ոչ թե իրենք, որ տաս տարի առաջ ծառայած տղամարդուն առանց վերապատրաստելու ուղարկում են առաջնագիծ, որ բազմաթիվ հրետանավորներ այդպես էլ չզորակոչվեցին, այլ, որ հայ տղաները առանց վարանելու գնում-կանգնու էին կրակի բերան` հանուն հայրենիքի:

Փաշինյանն ասում է՝ ոլորտում ունեցել են խնդիր՝ բախվել նաեւ դասալքության պրոբլեմի հետ։ Նիկոլ Փաշինյանը մեղադրում է բանակին՝ ասելով, թե որոշումը կայացրել է, երբ բանակը շարունակաբար պնդել է նման քայլի գնալու անհրաժեշտության մասին։

Մինչդեռ քաղաքացիները պնդում են՝ ուղեգիր ստանալուց հետո զինկոմիսարիատն իրենց չի զորակոչել:

«Փաստինֆո»-ն պատերազմի առաջին օրերին անգամ օդանավակայանում ֆիքսել էր, որ տասնյակ քաղաքացիներ պատրաստակամ վերադարձել էին հայրենիք՝ բանակի կողքին լինելու համար։

«Արաբո» ջոկատի հրամանատար Մանվել Եղիազարյանն այսօր հարցրեց՝ ինչու՞ զորահավաք չեն արել՝ պնդելով, թե որոշները որոշել էին տանուլ տալ ու տանուլ տվեցին։

Այսօր «Փաստինֆո»-ն կրկին դիմեց ՊՆ-ին` պարզելու, թե պահեստազորի քանի տոկոսն է զորակոչված եղել: Նկատենք, որ թիվ չենք ուզել, այլ ընդամենը ցանկանում էինք պարզելի, թե ինչպես է ընթացել զորակոչը, քանի տոկոսով է պահեստազորը զորակոչված եղել անցած 1,5 ամսվա ընթացքում: Արդյոք սպառվա՞ծ է եղել պահեստազորայինների քանակը՝ ՊՆ խոսնակ Շուշան Ստեփանյանը հրաժարվեց հարցին պատասխանել` ասելով, որ թվային տվյալների չի չի տիրապետում։ Նա առաջարկեց դիմել գրավոր հարցմամբ` առանց երաշխավորելու, որ կպատասխանեն:

Տապալվել է զորակոչը, թե ոչ, եթե այո, ապա ում կողմից եւ ինչու: Այս հարցերը ոչ միայն պետք է քննարկվեն ԱԺ-ում, այլեւ իրավապահների քննության առարկա դառնան:

Աղբյուր` Փաստինֆո