Փաստ ինֆո

Անթույլատրելի եմ համարում այդ փաստաթուղթը. այն բազմաթիվ մեծ վտանգներ է իր մեջ պարունակում: Այս մասին «Փաստինֆո»-ի հետ զրույցում ասաց «Հենակետ» վերլուծական կենտրոնի ղեկավար, ռազմական փորձագետ Տիգրան Աբրահամյանը:

Ինչպես արդեն հայտնել ենք, ՀՀ վարչապետ Նիկոլ Փաշինյանը երեկ Ռուսաստանի և Ադրբեջանի նախագահների հետ Ղարաբաղյան պատերազմը դադարեցնելու մասին հայտարարություն է ստորագրել, որի համաձայն զինված ուժեր մնալու են իրենց զբաղեցրած դիրքերում ու մտնելու ռուսական խաղաղապահ ուժերը: Ավելին` հայտարարության 9-րդ կետի համաձայն, միջանցք է տրամադրվելու Ադրբեջանին` Նախիջեւան գնալու համար:

Անդրադառնալով հենց այս 9-րդ կետին, որով ՀՀ-ն պետք է ապահովի տրանսպորտային հաղորդակցությունն Ադրբեջանի և Նախիջևանի միջև, փորձագետը նկատեց՝ բազմաթիվ հարցեր կան, որոնք չեն կարգավորում և պարզ չէ՝ դա իրենից ինչ է ներկայացնում, այդ թվում ինչպես է Հայաստանն ապահովելու այդ ճանապարը կամ առհասարակ ինչու է ապահովում. «Ինչ կապ ունի Հայաստանի Սյունիքի մարզն այնտեղ ծավալված գործողությունների հետ, որ մի հատ էլ այդ հայտարարության մեջ նման դրույթ է տեղ գտնում: Այդ փաստաթուղթն իր մեջ մեծ խնդիրներ է պարունակում և ընդհանրապես անհասկանալի է, թե այդ դրույթն ինչպես է այդտեղ հայտնվել: Ճիշտ է այնպես չէ, որ մնացած դրույթներն էլ տրամաբանական են, բայց հաշվի առնելով հանգամանքը, որ դա կապված է Ադրբեջանի և Նախիջևանի միջև կապի ապահովմանը մեր տարածքով, ինքնին բավականին մեծ հարցադրումներ ու խնդիրներ է առաջացնում»,-նշեց Տիգրան Աբրահամյանը:

Ինչ վերաբերում է փաստաթղթում նշված տարածքները Ադրբեջանին հանձնելու համար սահմանված սեղմ ժամկետներին, Տիգրան Աբրահամյանը նշեց, որ ով բանակցել է, նա էլ պետք է ասի, թե ինչու են նման ժամկետներ սահմանվել. «Առհասարակ տարածքների հետ կապված դրույթները բնական է, որ հանրային մեծ դժգոհություն են առաջացրել, այնպես որ այդ դրույթի ամենամեծ խնդիրը զուտ ժամկետների հարցը չէ, այլ առհասարակ դրույթներն են, որոնք տեղ են գտել այդ հայտարարության մեջ»,-նշեց փորձագետը:

Վերջինս ընդգծեց՝ վարչապետը դեռևս 2 տարի առաջ հայտարարել էր, որ այս հարցի հետ կապված ցանկացած որոշում քննարկվելու է հանրության հետ: Այլ բան է, թե դա ինչ մեթոդով էր արվելու, հաղորդակցման ինչ ուղիներ են լինելու: Տիգրան Աբրահամյանի խոսքով խնդիրն այստեղ այն է, որ գրեթե որևէ մեկը չի իմացել փաստաթղթի մասին. «Դա հանրությանը, քաղաքական ուժերին չի ներկայացվել և մեզ համար այդքան կարևոր, ամենաառանցքային հարցի հետ կապված վարչապետը որոշում է կայացրել, որի մասին որևէ մեկը չի իմացել»,-հավելեց Տիգրան Աբրահամյանը:

Աղբյուր` Փաստինֆո