Փաստ ինֆո

Ոչ բոլոր դեպքերում է, որ Քովիդ-19-ի բուժումը 14 օրյա է, լինում է նաև հակառակը, երբ ավելի կարճատև է լինում բուժումը, օրինակ՝ 5-6 օր։ Լինում է, որ շատ ավելի երկար է տևում բուժումը՝ նույնիսկ ամիսներ,- այս մասին ԱԺ-ում լրագրողների հետ ճեպազրույցի ժամանակ տեղեկացրեց Առողջապահության նախարար Արսեն Թորոսյանը։

«Վերջնական բուժման փաստը արձանագրելու թեստավորման նպատակահարմարությունը վաղուց մեր կողմից բացատրվել և հանվել է։ Բուժված լինելու փաստը արձանագրում ենք կլինիկական լավացումով և ոչ թեստավորումով։ Հիվանդանոցից դուրս գրվելուց հետո պացիենտը մնում է տանը՝ 14 օր»։

Նախարարը տեղեկացրեց՝ 861 քաղաքացի սպասում է հոսպիտալացվելու իր հերթին։ 1100 ծայրահեղ ծանր և ծանր վիճակում պացիենտներ կան։ Այս պահին 73 անձ արհեստական շնչառության ապարատին են միացված։ Նախարարը նշեց՝ սարքի պակաս չկա։

«Կանխատեսումները տարբեր են և բարդ է իրականացնել։ Մեր խնդիրը ոչ թե սարքի, այլ թթվածնի դեֆիցիտն է։ Մենք տիտանական ջանքեր ենք գործադրում, որպեսզի հանկարծ որևէ խափանում չլինի»,- ասաց նախարարհը։

Չայած մոբիլիզացիային, կան սահմանափակ ռեսուրսներ, որոնք օգտագործվում են ըստ ցուցումների:
«Դրանք պացիենտների առողջական վիճակն են՝ ծանրից դեպի ավելի թեթև: Այսինքն՝ մեր խնդիրն է հնարավորինս ծանր և ծայրահեղ ծանր պացիենտներին հոսպիտալացնել և օգնություն ցուցաբերել, իսկ ոչ ծանր և թեթև վիճակում գտնվող պացիենտներին փորձել բուժել տանը»,- նշեց Թորոսյանը։

Նախարարը տեղեկացրեց, որ կրկնավարակի դեպքեր ևս եղել են՝ դրանք 343-ն են։
Իսկ թե ինչո՞ւ համալիրի տարածքը չօգտագործվեց, նախարարը նշեց՝ անձնակազմի, թթվածնի և ինֆրաստրուկտուրայի առկայությունն ավելի կարևոր է.
«Համալիրի տարածքում քաղաքացուն հոսպիտալացնելը համարժեք է տանը թողնելուն»։

Նա նաև տեղեկացրեց, որ թեև համակարգն աշխատում է գերլարված և գերմոբիլիզացված վիճակում, այնուամենայնիվ, ռազմական գործողություններից տուժած քաղաքացիական անձանց, զինծառայողների մասով որևէ թերացում չկա:

«Չկա գեթ մեկ վիրավոր կամ քաղաքացիական անձ, որն ունեցել է վիրավորում կամ այլ վնասվածք ռազմական գործողությունների արդյունքում և չի ստացել պատշաճ բուժօգնություն»,-ասաց Թորոսյանը։

Աղբյուր` Փաստինֆո