Փաստ ինֆո

Վերջին օրերին մամուլում շրջանառվում է տեղեկատվություն, որ Ազգային ժողովի իշխող «Իմ քայլը» խմբակցությունը պատրաստվում է ՀՀ Քրեական օրենսգրքում փոփոխություններ անել եւ ազատազրկման ձեւով պատիժ նախատեսել ռազմական դրության ընթացքում տեղեկատվության հրապարակման և տարածման կանոնները խախտելու համար: 

ԱԺ «Իմ քայլը» խմբակցության պատգամավոր Թագուհի Թովմասյանը «Փաստինֆո»-ի հետ զրույցում ասաց, որ նախագիծը պաշտոնական խողովակներով դեռ խորհրդարան չի հասել. «Ես դեռ ծանոթ չեմ նախագծին, որովհետև մեր պատգամավորներից պաշտոնական խողովակով ոչինչ չի ասվել, հետևաբար չեմ կարող տեսակետ հայտնել՝ ինչ նախագիծ է և ինչպես է ծագել միտքը: Նախագիծը, ըստ ամենայնի, ներկայացվել է կառավարության կողմից, բայց թե ինչ հիմնավորմամբ և ինչ անհրաժեշտությամբ չեմ կարող ասել»,-ասաց Թագուհի Թովմասյանը՝ հավելելով, որ նախ պետք է հասկանանք՝ այն խորհրդարան կգա, թե ոչ, որից հետո տեսակետ հայտնել. «Գուցե դա ինչ-որ սևագիր տարբերակ է և հետո պարզվի, որ սևագիր էլ մնալու է, այդ պատճառով չեմ ուզում շտապել և դիրքորոշում հայտնել»,-նշեց պատգամավորը:

Հարցին՝ արդյոք այս ընթացքում լրատվամիջոցներում եղել են խուճապ առաջացնող և խնդրահարույց հրապարակումներ, որոնց համար միայն վարչական տուգանքները որպես զսպող օղակ արդյունավետ չեն, Թագուհի Թովմասյանը նկատեց՝ լուրջ լրատվամիջոցներում, որոնք իրենց առաքելությունն իրականացնում են որպես ԶԼՄ-ներ, այդպիսի հրապարակումների չի հանդիպել. «Բայց հանդիպել եմ շատ տարբեր կայքերի, որոնց ծագումը չգիտեմ, որոնց գտնվելու վայրը, աշխատակազմից որևէ մեկին չեմ ճանաչում: Այսինքն կան կայքեր, որոնք զբաղված են տարատեսակ ինֆորմացիաներ տարածելով և պատասխանատվություն չեն կրում: Կարծում եմ՝ թերևս այսպիսի նախագծերով փորձ է արվում նման կայքերին պատասխանատվության դաշտ բերել, բայց այնուամենայնիվ համոզված եմ, որ այդ բնույթի կայքերի նկատմամբ կոշտ միջոցներ կիրառելով՝ իրականում կարող ենք վնասել բարեխիղճ աշխատող լրատվամիջոցների աշխատանքը, վտանգել նրանց խոսքի ազատությունը, հետևաբար կարծում եմ՝ անանուն, կեղծ լուրեր տարածող կայքերին պետք է ուղղակի գտնել և արգելափակել, որովհետև իրենք ոչ թե լրատվամիջոց են, այլ ուղղակի զբաղված են գումար աշխատելով»,-ասաց Թագուհի Թովմասյանը՝ ընդգծելով, որ պետք է տարբերենք լրատվամիջոցներին գումար աշխատող, կեղծ լուրեր տարածող կայքերից, որպեսզի որևէ լրատվամիջոց օրենքի որևէ խստացումից չտուժի:

ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը վստահ է՝ այս նախագիծն անպտուղ և անիմաստ է: Պատգամավորը կարծում է՝ հենց նմանատիպ նախաձեռնություններն են, որ խուճապ են առաջացնելու. «Երկու տարի առաջ Հյուսիսային Կորեայի իշխանություններն իրենց ժողովրդին «ավետեցին», որ Հյուսիսային Կորեան հաղթել է ֆուտբոլի աշխարհի առաջնությունում, և ամբողջ ժողովուրդը հրճվանքի մեջ էր, մինչդեռ որքան տեղյակ եմ իրենց թիմն ընդահանրապես չէր էլ մասնակցել աշխարհի առաջնությանը: Հիմա եթե նպատակն այն է, որ բոլորիս բերանը փակեն, կասեմ, որ Հայաստանը Հյուսիսային Կորեա չէ և որևէ մեկին դա չի հաջողվելու: Ռազմական դրության ժամանակ մենք բոլորս գիտենք՝ ինչպես ենք մեզ պահում և իմանալով հսկայական տեղեկատվություն, հսկայական մտահոգիչ տեղեկատվություն, որը ռադիկալ տարբերվում է պաշտոնական տեղեկատվությունից, մենք լռել ենք, չենք խոսել և այս պահին ևս չենք խոսում: Այսինքն կարծիք ունենալը կամ մտահոգություն, հարցադրումներ հայտնելը պետք է ազատազրկե?ն»,-ասաց Նաիրա Զոհրաբյանը՝ նախագծի հեղինակներին խորհուրդ տալով հետ կանգնել պատգամավորի բնորոշմամբ մարդկանց մտահոգությունները, քաղաքական ուժերի կարծիքները խեղդելու նախաձեռնությունից:

Պատգամավորը գտնում է, որ նախագիծը հակառակ էֆեկտն է ունենալու և բումերանգի նման հարվածելու է նախաձեռնողներին. «Որևէ քաղաքական ուժ այս ընթացքում թույլ չի տվել գնահատական հնչեցնել, որը կարող է խուճապ կամ հոռետեսական, անկումային տրամադրություններ առաջացնել: Այսինքն ինչի համար եք բերում այս նախաձեռնությունը: Բերում եք, որ ժողովուրդը չիմանա ճշմարտությունը: Իմանալու է, քանի որ մենք լուսնի, Մարսի վրա չենք ապրում»,-ասաց ԲՀԿ-ական պատգամավորը:
Նաիրա Զոհրաբյանը հավելեց՝ չի հասցնում լրատվամիջոցների ամբողջ ծավալն ուսումնասիրել, սակայն իրեն հայտնի չէ լրատվամիջոց, որն անցել է սահմանները, փորձել հրապարակել տեղեկատվություն, որը կարող էր վնասել առաջնագծում կանգնած զինվորին:

ԱԺ ընդդիմադիր մյուս՝ «Լուսավոր Հայաստան» խմբակցությունում նախագծի վերաբերյալ քննարկումներ դեռևս չեն եղել: Պատգամավոր Աննա Կոստանյանը «Փաստինֆո»-ին ասաց, որ նախագծին ամբողջապես առայժմ առիթ չի ունեցել ծանոթանալ, բայց առաջին հայացքից այն պատգամավորին բացասական է թվում. «Սա շատ ծանր մահակ կարող է հանդիսանալ քաղաքացիների վրա: Հնարավոր բոլոր մեղմացուցիչ հանգամանքները պետք է հաշվի առնել: Չեմ կարող ասել՝ օրինակ հաշվի առնվել են բարձրաստիճան պաշտոնյաների կողմից համապատասխան խախտումներ թույլատրելու առնչությամբ նմանատիպ խիստ, պատժիչ գործողություններ իրականացնելը, թե դա ուղղակի քաղաքացիների ինչ-որ առումով նաև խոսքի ազատությունը սահմանափակելու համար է: Չեմ կարող միանշանակ կարծիք հայտնել, բայց առաջին հայացքից արդեն իսկ բացասական երանգ է ստեղծում նախագիծը»,-նշեց Աննա Կոստանյանը:

Աղբյուր` Փաստինֆո