Փաստ ինֆո

Արցախում պատերազմը ընթանում է ողջ ուժգնությամբ, տարբեր վայրերում, Շուշին այս պահին ակտիվ պատերազմական գործողությունների թատերաբեմ է,մայրաքաղաք Ստեփանակերտն էլ ուժգին հարվածների, ռմբակոծության է ենթարկվել այսօր առավոտից,- «Փաստինֆո»-ի հետ զրույցում քիչ առաջ տեղեկացրեց Արցախի նախագահի խորհրդական Դավիթ Բաբայանը:

Հիշեցնենք, որ առավոտյան Արցախի նախագահ Արայիկ Հարությունյանը գրառում էր կատարել՝ տեղեկացնելով, որ այցելել է «Ստեփանակերտը պաշտպանող մարտական դիրքեր, տեղում զրուցել Պաշտպանության բանակի մարտիկների ու աշխարհազորայինների հետ, ովքեր ավելի քան մեկ օր, է ինչ ետ են մղում մայրաքաղաքի վրա Շուշիից գրոհող թշնամու հրոսակախմբերին:

Նախագահի այս վերջին արտահարտությունը որոշակի տարակարծության և խուճապի տեղիք տվեց հասարակության շրջանում, ոմանք նշում էին, որ սա հավանաբար վրիպակ է:
Մեր խնդրանքով Դավիթ Բաբայանը պարզաբանեց նաև Արցախի նախագահի այս գրառումը և հստակեցրեց, որ
Շուշիում ակտիվ ռազմական գործողություններ են ծավալվում, ուստի որևէ տեղեկություն չպետք է խուճապ առաջացնի.

«Երբ որ ես ասում եմ, որ Շուշին դարձել է ակտիվ պատերազմական գործողությունների թատերաբեմ, դա նշանակում է՝ և՛ այստեղից են իրականացվում պատերազմական գործողություններ, և՛ դրա դեմ են իրականացվում պատերազմական գործողություններ՝ տարբեր ձևերով, լինի դա մարտեր, հրետանու աշխատանք:Հիմա եթե Շուշին պատերազմական գործողությունների թատերաբեմ է, նշանակում է, որ այդտեղից էլ են փորձում գրոհել, Արցախի նախագահի գրառման մեջ արտառոց բան չկա, եթե թատերաբեմ է, այսինքն՝ իրենք էնտեղից են փորձում, մենք էլ այստեղից»,-ասաց Դավիթ Բաբայանը:

Վերջինիս խոսքով՝ հասարակությունը չպետք է խուճապի մատնվի, այլ պետք է իրականությունը սթափ գնահատի.

«Սթափ գնահատել նշանակում է՝ խուճապի չմատնվել և իրականությունից չկտրվել, ինչ-որ տեղեկություններով իլյուզաներից չհարբենք, ապատեղեկատվությամբ ոչ պետք է հրապուրվենք, ոչ էլ խուճապի մատնվենք , պետք է սթափ իրականությունը գնահատենք»:

Աղբյուր` Փաստինֆո