Փաստ ինֆո

ԱԽ ձևաչափով փակ քննարկման անհրաժեշտության վերաբերյալ արդեն երկրորդ կոչն է։ Կրկին դիմել ենք, որովոհետև ունենք հարցեր, որոնք պետք է ստանան պատասխաններ և դա այն ձևաչափ է, որտեղ այդ հարցերը պետք է բարձրացվեն ։ Այս մասին լրագրողների հետ զրույցում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը։

«Այն, որ նիստը չի կայացել, դրանից մեր առաջարկը ոչ նահանջում է, ոչ էլ՝ չեղարկվում։ Այսինքն՝ մենք տեսնում ենք դրա անհրաժեշտությունը, հետևաբար ցանկալի կլինի, որ այդ նիստը կայանա»,- նշեց Սամսոնյանը։

Ինչ վերաբերում է Էդմոն Մարուքյանի մասնակցությամբ արդեն կայացած նմանատիպ նիստին, Սամսոնյանը նշեց, որ այդ հանդիպումից շաբաթներ են անցել, իսկ ռազմաճակատում զարգացումները լինում են նույնիսկ րոպե առ րոպե, իրավիճակ է փոխվում և այն տեղեկությունը, որը ստացվել էր նախորդ նիստի ժամանակ, արդեն արդիական չէ։Հարցին՝ ինչու ԼՀԿ-ի համար բավարար չեն պաշտոնական աղբյուրների հայտնած տեղեկությունները, Սամսոնյանը նշեց, որ ԱԺ-ն այն մարմինն է, որն իրավունք ունի ստանալու այնպիսի տեղեկատվություն, որը պարունակում է ռազմական և մարտավարական բաղադրիչ։ Դրանք այն հարցերն են, որոնք հրապարակային քննարկման համար չեն։ Նրա խոսքով՝ որպես պատգամավորներ ունեն նաև գաղտնի տեղեկատվությանը հասանելիություն, հետևաբար ունեն նաև իրավունք տեղեկանալու, թե այս պահին ինչ աշխատանքներ են տարվում դիվանագիտական ճակատում և ինչպիսի իրադրություն է ռազմաճակատում։

«Եթե մեզնից պահանջում են միասնականություն, ինչը մենք ցուցաբերում ենք, մենք էլ փորձում ենք այդ միասնականության համար ձեռք բերել այնպիսի տեղեկատվություն, որպեսզի ավելի ռեալ գնահատենք իրավիճակը և ավելի շատ մեր գործողությունները հարմարեցնենք այդ իրավիճակին»,- նշեց Սամսոնյանը՝ հավելելով, որ հետաքրքիր է, թե ինչ պլաններ կան դիվանագիտական առումով, ինչ ռազմավարություն է մշակվել, ինչի վրա պետք է ուշադրություն դարձնել, ինչ է անհրաժեշտ, որ մեր հաջողությունները լինեն ավելին, քան կան ռազմաճակատում։

Աղբյուր` Փաստինֆո