Փաստ ինֆո

Ռազմաճակատում իրավիճակը շարունակում է մնալ լարված: Այս մասին քիչ առաջ ճեպազրույցի ժամանակ ասաց ՀՀ ՊՆ ներկայացուցիչ Արծրուն Հովհաննիսյանը:

«Երեկ ողջ գիշեր և այսօր ամբողջ օրվա ընթացքում ռազմաճակատի տարբեր ուղղություններով մարտերը շարունակվել են: Մարտերը եղել են բավականին ինտենսիվ: Նախ` հյուսիսում թշնամու զորքերը՝ հիմնականում փոքր մարտավարական խմբեր հրետանու կրակի աջակցությամբ փորձել են հարձակվել մեր դիրքերի ուղղությամբ, սակայն, կորուստներ կրելով, հետ են շպրտվել: Մարտունու ուղղությամբ վաղ առավոտյան որոշակի հաջողություններից հետո մեր զորքերին հաջողվել է թշնամուն կանգնեցնել, հետ շպրտել ելման բնագծերը: Շուշիի մեջ և շրջակա հարակից տարածքներում պարիսպների տակ, ճանապարհների վրա, որոնք տանում են դեպի Շուշ,ի մարտերը ողջ օրվա ընթացքում եղել են բավականին սաստիկ, այս պահին էլ որոշակի մարտեր ընթանում են, չնայած ինտենսիվությունը զգալիորեն թուլացած է»,-նշեց Արծրուն Հովհաննիսյանը:

Վերջինս հավելեց, որ այսօր սաստիկ մարտեր են եղել նաև Բերձորի ուղղությամբ: Թշնամու ուժերը մի քանի անգամ փորձել են ճեղքել և դուրս գալ դեպի Բերձոր՝ փորձելով այդ ուղղությամբ օգնության հասնել Շուշիում կռվող իրենց ստորաբաժանումներին. «Կրելով զգալի կորուստներ՝ հետ են շպրտվել: Ավելին, փախուստի են դիմել»,-ասաց Արծրուն Հովհաննիսյանը:

Աղբյուր` Փաստինֆո