Փաստ ինֆո

Հակառակորդին առավոտյան հաջողվել է որոշակի դիրքային բարելավում ունենալ Մարտունու ուղղությամբ, բայց նորից հետ են շպրտվել: Ճեպազրույցի ժամանակ այս մասին ասաց ՀՀ ՊՆ ներկայացուցիչ Արծրուն Հովհաննիսյանը:

Նա նշեց, որ բավականին մեծաթիվ զրահատեխնիկայով և մարտավարական խմբերով ներթափանցման երկու փորձ են իրականացրել, մեկը Ճարտարի ուղղությամբ, մյուսը՝ Մարտունի քաղաքի ուղղությամբ: Երկու փորձերն էլ կասեցվել են և թշնամին հետ է շպրտվել:

Անդրադառնալով Շուշիի համար մղվող ճակատամարտին՝ Արծրուն Հովհաննիսյանն ասաց. «Ընդհանուր օպերատիվ իրավիճակն իմանալով, ուժերն ու միջոցները, որոնք Ալիևի կողմից ներդրված են եղել Շուշին գրավելու համար, և մեր իրավիճակը հասկանալով՝ հուսով եմ, որ կավարտվի Շուշիի համար ճակատամարտը»,-նշեց Արծրուն Հովհաննիսյանը:

Հարցին՝ արդյոք Շուշիի համար մարտերի ավարտը կարող է որևէ փոփոխություն առաջացնել մյուս ուղղություններում մղվող մարտերի առումով և կարող է դա նշանակել առհասարակ ռազմական գործողությունների ավարտ, Արծրուն Հովհաննիսյանը նշեց. «Կարող է, բայց չեմ կարծում, որ մի ճակատամարտից հետո պատերազմը շատ արագ այսպես կավարտվի»,-ասաց Արծրուն Հովհաննիսյանը:

Աղբյուր` Փաստինֆո