Փաստ ինֆո

Նոյեմբերի 5-ից Մոսկվայում գտնվող ՀՀ ԱԺ փոխնախագահ Ալեն Սիմոնյանի հանդիպումների մասին ոչ Հայաստանում, ոչ Ռուսաստանում ոչինչ չի հաղորդվում: Համենայն դեպս` երկու երկրների խորհրդարանները հանդիպումների մասին որեւէ հաղորդագրություն չեն տարածել:

Ինչպես ավելի վաղ տեղեկացրել էինք, ԱԺ փոխնախագահ Ալեն Սիմոնյանը նոյեմբերի 5-11-ը գործուղվել է Մոսկվա։ Որոշման համաձայն՝ ԱԺ փոխնախագահի հետ Մոսկվա է գործուղվել նաև ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը:

Հանդիպումների ու օրակարգի մասին պաշտոնական որեւէ հայտարարություն չի եղել:

ՏԱՍՍ-ին տված հարցազրույցում Ա.Սիմոնյանը նշել է, որ Մոսկվա է ժամանել, որովհետև շատ կարևոր է քննարկել և ներկայացնել տարածաշրջանում ստեղծված այսօրվա իրավիճակը: «Այստեղ ես հանդիպումներ կունենամ Պետդումայի, հնարավոր է՝ նաև Դաշնային Խորհրդի իմ գործընկերների հետ, նախատեսված են զրույցներ քաղաքագետների հետ: Համոզված եմ, որ շատ բան ռուսաստանյան գործընկերներին անհրաժետ է ներկայացնել առաջին դեմքից», - նշել է նա:

«Փաստինֆո»-ն փորձեց մանրամասներ իմանալ Ա.Սիմոնյանի մոսկովյան հանդիպումների մասին ԱԺ աշխատակազմի ղեկավարից, ճշտել ինչու հանդիպումների մասին տեղեկատվություն չի հրապարակվում ԱԺ կայքում: Բայց մեր հարցին ի պատասխան ԱԺ աշխատակազմի ղեկավար Տիգրան Գալստյանը վրդովված պահանջեց հարցումը գրավոր ուղարկել` դժգոհելով, որ շաբաթ օրով փորձում ենք տեղեկություն ճշտել: Թե պատերազմական վիճակում հանգստյան օրվա մասին խոսելն ու մտածելը որքանով է տեղին ու արդարացված` հայտնի է միայն իրեն: Ավելին` զանգելու անհրաժեշտություն չէր լինի` եթե ԱԺ աշխատակազմի ղեկավարը կատարեր օրենքի պահանջը պատերազմական վիճակում գտնվող երկրի խորհրդարանի բարձրաստիճան պաշտոնյայի` օտարերկրյա այցերի մասին տեղեկությունը հրապարակեին պաշտոնապես` ԱԺ կայքում:

Հուսանք, ԱԺ աշխատակազմը գոնե մոսկովյան այցի ավարտին տեղեկություն կտրամադրի ԱԺ փոխնախագահի մոսկովյան այցի մասին, եթե այնտեղ դրանք տեղի ունեցել են:

Աղբյուր` Փաստինֆո