Փաստ ինֆո

Ռուս-թուրքական ժամանակակից հարաբերությունները տեղավորվում են այսպես կոչված «համագործահակամարտային» տրամաբանության մեջ, երբ մի կողմից համագործակցում են, մյուս կողմից էլ, ունենալով աշխարհաքաղաքական բախվող շահեր, մրցակցում կամ հակամարտում,-այս մասին «Փաստինֆո»-ի հետ զրույցում ասաց թուրքագետ Լևոն Հովսեփյանը` նշելով, որ բարեկամ-թշնամի դուալիզմը ներհատուկ է այդ երկրների արդի հարաբերություններին և երբեմն այդ դուալիզմի հավասարակշռությունը փոխվում է:

Փորձագետը նկատում է, որ տարբեր ուղղություններում Ռուսաստանը քայլեր է իրականացնում Թուրքիային զգուշացնելու, զսպելու ուղղությամբ, ինչպես օրինակ՝ օդային հարվածները` Սիրիայի զինյալների ճամբարներին, սակայն դա բավարար չէ և չի կանգնեցնի Անկարային, այն ներքաշվել է մի գործընթացում, որից դուրս գալը մշուշոտ է.

«Անկարան փորձում է ցույց տալ իր վճռականությունն ու այսպես կոչված հետևողականությունը:Ռուսաստանը սովորություն ունի տարբեր ռազմաքաղաքական իրավիճակներին դանդաղ պատասխանելու, ուստի կարծում եմ աստիճանական այդ գործընթացը տեղի է ունենում։ Որքան Անկարայի հանդգնությունը շարունակվի, այդքան ռուսական հակազդեցության մակարդակը կփոխվի»,-մեզ հետ զրույցում ասաց Լևոն Հովսեփյանը:
Վերջինիս դիտարկմամբ՝ Թուրքիայի՝ որպես Արցախի դեմ ադրբեջանաահաբեկչական պատերազմը պլանավորողի ու ղեկավարողի, նախնական հաշվարկները ձախողվել են, այն առումով, որ հուժկու պատերազմը արագ կավարտվի՝ ապահովելով ադրբեջանական ուժերի հաղթանակը.
« Հայկական բանակը ձախողեց թուրքական գլխավոր շտաբի այդ սցենարը: Սա տեղի չունեցավ, և հիմա Անկարան վճռական երևալու խնդիր ունի, այն լրջորեն է ներգրավվել այս պատերազմում՝ պլանավորումից մինչև ղեկավարում, հատուկ ծառայություններից մինչև սպառազինություն ու վարձկաններ։ Անկարայի հավակնություններն ու ռազմավարությունն ավելին է, քան պատերազմում Ադրբեջանին նման աջակցությունը։ Որքան Թուրքիայի աջակցությամբ ու ղեկավարմամբ պատերազմը ձգվի, այդքան ռուսական հակազդեությունը կմեծանա, դրա քաղաքական ազդակները արդեն իսկ դրսևորվում են։

Փորձագետի համոզմամբ՝ Թուրքիան օգտագործում է և կօգտագործի Ռուսաստանի այլ ուղղություններով պրոքսի հարվածները՝ Լիբիայից մինչև Ուկրաինա, ինչու ոչ՝ ռուսաստանյան սուբյեկտներ, ուստի այս տարածաշրջանում Թուրքիային լուրջ խաղաքարտ տալը կնշանակի հարվածի տակ դնել ռուսական կենսական շահերը ոչ միայն Հարավային Կովկասում։

«Այն ինչ հիմա իրականացնում է Թուրքիան Հարավային Կովկասում, Սիրիայում իր կողմից արվածի «մարսումն» էր։ Կարծում եմ սա գիտակցում են ռուսական ռազմաքաղաքական շրջանակները»,-ասաց Լևոն Հովսեփյանը:

Աղբյուր` Փաստինֆո