Փաստ ինֆո

Ռազմաճակատ մեկնելու ցանկություն հայտնած անազատության մեջ գտնվող անձանց դիմումների քննարկման արդյունքում այս պահի դրությամբ փոփոխվել է 12 կալանավորի խափանման միջոց, 11 դատապարտյալ պայմանականորեն վաղաժամկետ ազատ է արձակվել։ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը «Փաստինֆո»-ի հետ զրույցում ասաց, որ գրեթե բոլորն էլ ներկայացել են իրավասու մարմին, այսինքն զինկոմիսարիատ, նրանց մեծ մասը մեկնել է ռազմաճակատ։

Ինչպես ավելի վաղ տեղեկացրել ենք՝ թուրք-ադրբեջանական ագրեսիայիով պայմանավորված ՔԿՀ-ներում անազատության մեջ գտնվող անձինք ևս դիմումներ էին ներկայացրել՝ խափանման միջոցի փոփոխման և առաջնագիծ մեկնելու համար, սակայն նրանց դիմումների վերաբերյալ որոշումներ չէին կայացվել, քանի որ օրենսդրական ընթացակարգը բացակայում է. կոնկրետ ռազմական դրությամբ պայմանավորված թե՛ խափանման միջոցների փոփոխության, թե՛ պատժից ազատման կարգ մենք չունենք։

Նշենք, որ ներկայացված յուրաքանչյուր դիմումի նկատմամբ ցուցաբերվում է խիստ անհատական մոտեցում՝ հաշվի առնելով թեմայի նրբությունը։

Գոռ Աբրահամյանը մեզ հետ զրույցում պարզաբանեց, որ դատապարտյալների դեպքում պետք է առկա լինեն վաղաժամկետ պայմանական ազատ արձակելու՝ օրենքով նախատեսված հիմքերը, իսկ կալանավորում փոփոխության դեպքում հաշվի են առնվում անձի՝ նախկինում դատվածություն ունենալու հանգամանքը, այն հանցանքի բնույթը, ծանրության աստիճանը, որի կատարման մեջ նա մեղադրվում է, առողջական վիճակը, զինված ուժերում ծառայություն անցած լինելու հանգամանքը:

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Հեղինակ՝ Իզաբել Սահակյան

Աղբյուր` Փաստինֆո