Փաստ ինֆո

Որևէ միջազգային կազմակերպություն՝ բացառությամբ ՄԱԿ-ի, արցախյան հակամարտությանը միջամտելու լիազորություն չունի, դրա համար անհրաժեշտ է Անվտանգության խորհրդի որոշումը, որը կարող է լինել տարբերակված՝տնտեսական, ընդհուպ մինչև ուժի կիրառում,-այս մասին խորհրդարանում ԱԺ տարածաշրջանային և եվրասիական ինտեգրման հարցերի և ֆինանսավարկային ու բյուջետային հարցերի մշտական հանձնաժողովների համատեղ նիստում ասաց ՀՀ արտաքին գործերի փոխնախարար Շավարշ Քոչարյանը:

ԱԳՆ փոխնախարարի դիտարկմամբ՝ տարբեր միջազգային կառույցներ ավելի հստակ են արտահայտվում Արցախում տեղի ունեցող ռազմական հանցագործությունների և մարդու իրավունքների խախտման համար.

«ՄԱԿ-ի անվտանգության խորհրդի երեք մշտական անդամ պետության առաջին դեմքերը՝ Պուտինը,Մակրոնը և Թրամփը կոչ են արել, սակայն արդյունք չկա: Իհարկե շատ կարևոր է բոլոր միջազգային կառույցների դիրքորոշումը, սակայն խնդիրը լուծվում է մարտի դաշտում: Սա ենթադրում է մեր համախմբվածությունը, մեր նպատակային աշխատանքը, համերաշխությունը՝ հանուն աշխատանքի»,-ասաց Շավարշ Քոչարյանը:

Շավարշ Քոչարյանը ընգծեց, որ ԵԱՀԿ-ն Մինսկի եռանախագահները չունեն մանդատ՝ պարտադրելու, իրենց մանդատը միջնորդ լինելն է.

«Սա նշանակում է, որ Մինսկի համանախագահները պետք է առաջարկեն տարբեր փոխզիջումային մոտեցումներ և նպաստեն, որ կողմները գան համաձայնության, ինչպես նաև թույլ չտան, որ վերսկսվեն ռազմական գործողությունները»,-ասաց ԱԳ փոխնախարարը:

Աղբյուր` Փաստինֆո