Փաստ ինֆո

Այս պահին ունենք Սիրիայի Արաբական Հանրապետության քաղաքացի հանդիսացող երկու վարձկանի վերաբերյալ տվյալներ, որոնց մասնակցությամբ իրականացվել են քննչական գործողություններ, նրանց մեղադրանք է առաջադրվել և նրանց նկատմամբ որպես խափանման միջոց է ընտրվել կալանավորումը։ Այս մասին լրագրողների հետ հանդիպմանն ասել է ՔԿ քրեագիտական վաևչության պետ Ռաֆայել Վարդանյանը։
Նրա փոխանցմամբ` միջոցներ են ձեռնարկվում, որ կալանավորված վարձկանները կապ հաստատեն հարազատների հետ, տեղեկացնեն իրենց գտնվելու վայրի, կարգավիճակի վերաբերյալ,սակայն այս պահին դա չի հաջողվել` տեխնիկական պատճառներով, այն է` հարազատների մոտ չկա հեռախոս։

Ինչ վերաբերում է պահման պայմաններին, ապա Վարդանյանը հայտնեց, որ առաձին հսկողություն է իրականացվում։ ԱԱԾ Քննչական դեպարտամենտի պետի տեղակալ Վազգեն Ավետիսյանն էլ նշեց, որ վարձկաններն ունեն դատավարական կարգավիճակ, ՀՀ-ի և ԱՀ-ի համար կարևոր նշանակության անձինք են՝ ցույց տալու ամբողջ աշխարհին, որ այն մտահոգությունները, հրապարակայնացվող տեղեկությունները, որ մեր դեմ պատերազմում են վարձկաններ, այսինքն, միջազգային կոնվենցիաներով արգելված հանցագործություն է տեղի ունենում, փաստարկված է:

Ինչ վերաբերում է վարձկաններին որոշակի արգելված հոգեմետ նյութերի տրամադրմանը, Ավետիսյանը տեղեկացրեց, որ այդ հանգամանքը նույնպես չի անտեսվել և երկու վարձկաններից վերցվել են մեզի, մազի, արյան նմուշներ, նշանակվել են փորձաքննություններ։

Վարձկաններն առաջադրված մեղադրանքում իրենց մասնակի են մեղավոր ճանաչել։ Ռաֆայել Վարդանյանը հայտնեց, որ վերջիններս նշել են, որ ոչ ոքի չեն սպանել, մինչդեռ Ռ. Վարդանյանը նշեց, որ նրանց կոնկրետ անձի սպանության համար չի մեղադրանք առաջադրվել:

«Փաստինֆո»-ն ավելի վաղ հայտնել է, որ վարձկաններին Հայաստանում մեղադրանք է առաջադրվել ՀՀ քրեական օրենսգրքի 389-րդ հոդվածով (միջազգային ահաբեկչություն), 34-390-րդ հոդվածի 1-ին մասի 1-ին կետով, 3-րդ մասի 1-ին կետով (միջազգային մարդասիրական իրավունքի նորմերի լուրջ խախտումները զինված ընդհարումների ժամանակ) և 395-րդ հոդվածի 3-րդ մասով (վարձկանություն)։

Աղբյուր` Փաստինֆո